Alcaraz mit fukna World No 1

Olympic silver medal a awrh hnua Carlos Alcaraz-a hmachhawp lian ber ni zui leh ta chu ATP live race kal mekah Turin khuaa mipa tennis season khar hun (season finale) thlenga world number one nih a nih thu a sawichhuak.
Tun dinhmunah Spaniard world number three hian point 450-in number one ni mek Italian Jannik Sinner a pha lo mek.
Grand Slam title hnuhnung pahnih a lakzawn hnuain Paris Olympics-ah gold medal a beisei zui leh a, final-a a hneh mai tura ngaih Djokovic lakah tlawmin silver medal awrh ta zawk a, tunah chuan season la bawng zawngah hian world top-ranked player nih a tum zui dawn tih a sawi.
Kum 21 mi lek ni chunga French Open leh Wimbledon champion lai ni mek hian US Open inbuatsaihna tournament pawimawh Cincinnati Open khelh tan leh tak chu year-end number one battle bul tan tak takna atan a hmang zui leh dawn a ni.
Alcaraz chuan, “Number one nih hi chu englai pawha kan goal kha a ni sa ve hrim hrim a, he tlankawnga inelna hi ka tan a pawimawh a, kum tawpa number one nih hi thlakhlelh loh theih a ni lo. Chu mi lamah chuan ka insawrbing tak meuh a, tournament tinah hei hi ka tinzawn zel dawn a, great tennis khelh bansan si lo leh he tlankawnga result tha hlamchhiah loin.
“Tun dinhmunah chuan kumin kum tawpa number one nih hi ka tum lian ber zinga pakhat a ni,” a ti.
Nikum Cincinnati runner-up Alcaraz hian kumin March thla Miami quarter-final a khelh hnua hardcourt tennis-a a kirleh vawikhatna turah hian first round lamah Gael Monfils a nih loh chuan Alexei Popyrin hmachhawn chungin bul a tan dawn a ni.
Cincinnati Open hi August ni 26 atanga September ni 8 chhunga khelh tur US Open atana inbuatsaihna tournament pawimawh a ni.
“He hmuna ka inlan leh thei tur hi ka phur a, nikum kha hriatrengna duhawm niin, chak teuh tak chungin final-ah ka tlawm a, Djokovic nena inbeihna kha inbeihna lian a ni.”
Olympic hlawhtlinna a sualchhuah hnu khan Djokovic chu Cincinnati tournament atang hian a inhnukdawk thung a, Spaniard hi champion tura rinkai ber a ni mek lo thei lo.