Arab rama inhnek tur Mizo boxer Thanpuia

Arab rama inhnek tur
Mizo boxer Thanpuia
Boxing hmanga vawi duai lo Serchhip district lo tihmingtha tawhtu Serchhip district boxer chhuanvawr Justin M. Lalthanpuia s/o Hmingsawilai, North Vanlaiphai Damdawi Veng chu Asia khawmualpui huap boxing-a inelna sang ber Asian Championship 2024 khel tura thlan a ni.
Tun thla nawi lam August ni 27, 2024 khian Dubai, Abu Dhabi-ah an inhnek tan ang a, he championship hian September ni 10 thleng a awh ang.
Tunah Thanpuia hi Shillong Army Boys Hostel-ah a awm mek a, Mizoram pum huap boxing inelna liamtham – Mizoram State Boxing Championship, Inter District Boxing Championship leh Mizoram Open Boxing Championship-ahte gold medal a lo hnekchhuak tawh a ni.
Delhi bul, Greater Noida hmuna kumin March ni 25-a zawh fel tak Sub-Junior Boys & Girls National Boxing Championship 2024-ah khan 43-46 kgs weight category final bout-ah Haryana boxer hnehin gold medal a lo hnekchhuak tawh bawk.
Hemi tuma a lo haw hi Serchhip District Boxing Association (SEDBA)-te’n Serchhipah lo hmuakin, a pualin chawhluite an lo buatsaihsak tawh a; North Vanlaiphai khawtlang pawhin a khaw nawtin an lo hmuak tawh bawk.
Hemi hnu hian Justin M. Lalthanpuia hian phailama boxing zir tura sawmna a dawng nghal mawlh mawlh a; Lunglei SAI atangin Haryana state-a Rohtak hmunah insawnin, tunah tak hian Shillong lama a intuaihriam mek thu tarlan a ni tawh a, naktuk August ni 16 khian Karnataka-a IIS JSW Vidyanagar-ah camp turin a lut zui lehnghal ang a, heta tang hian Dubai-ah inhnek turin a chhuk tawh ang.
SEDBA chuan an boxer Justin M. Lalthanpuia’n international huap boxing inelna lian Asian Championship a khel thei tur chu an lawmpuiin an chhuang takzet tih an sawi a, gold medal rawn hnekchhuak ngei turin duhsakna sang ber an hlan tih an tarlang tel.