N.Vanlaiphaiah I-Day boycott

Sawrkara thil phut an neih tih hlawhtlin a nih loh avangin, an ruahman sa angin North Vanlaiphaia tlawmngai pawl intelkhawm chuan Ningania Independence Day hman tur chu an dodal (boycott).
Thudawn danin, N.Vanlaiphaiah hian sub divisional officer (SDO) civil kaihhruaiin an office kawtah India zalenna champha lawmna hi zing dar 7.30 a hman tura ruahman a ni a. NGO Coordination Committee hi zing dar 6.30 atanga duty tanin, Independence Day lawmnaa kal tur sawrkar hnathawkte an lo dang a; programme pawh hi thulh zui a ni.
N.Vanlaiphai SDO hian a staff pathum leh police duty pahnih nen zing dar 5.30 vel khan national flag a lo pawtparh a, programme duansa ang chuan hman a ni ta lo niin NGO Coordination Committee chairman K Lalroluahpuia chuan a sawi.
NGO hruaitute sawi danin, N.Vanlaiphai mipuiin sawrkara an thil phut a hlawhtlin loh avang leh ngaihsak an nih tawk loh avangin Independence Day boycott hi kalpui an ni a. An khawtlangin sawrkara harsatna an thlen, tihhlawhtlin a nih theih nana hma an lakna hian awmzia a nei loa, thu lawmawm hriat tur a awm lo a nih chuan a tul danin hma lak zel an tum a ni.
N Vanlaiphai NGO Coordination Committee hian Govt N.Vanlaiphai High School headmaster leh N. Vanlaiphai damdawi ina Ayush doctor, a thlaktu awm loa sawn an ni chu an aiawh dah turin sawrkar an ngen a; tihhlawhtlin a nih loh avangin Independence Day lawmna hi boycot nise, tiin an lo rel tawh a ni.