ZPM-in thudik loin min puh – Tawnluia

Ration card var hmanga buhfai man tih to chungchangah ZPM chuan thudik loin MNF a puh niin MNF hruaitu Tawnluia chuan a sawi a. A order lekchhuak turin a phut tih a sawi.
Zirtawpnia Mizo Hnam Runa inkhawmah MNF sawrkar laia deputy chief minister Tawnluia chuan, MNF sawrkar laiin ration card vara buhfai leina rate tihsan, Supply department atanga rawtna chu cabinet-in a ngaihtuahtu tur Sub Committee a din a, chairman-ah deputy chief minister niin, vice chairman-ah Supply minister, secretary-ah Supply secretary, member atan NGO aiawhte leh Consumer Union aiawh leh sawrkar official-te ruat an ni a. Uluk taka ngaihtuah a nih hnu in Committee hian tihpun turin rawtna a siam loa, cabinet-ah pawh report pek luh a la ni loa, inthlan puanin a zui ta niin a sawi.
“MNF hunlaiin tihpun lohin vawiin thlengin a kal a. ZPM sawrkarin kumin October atanga tih pun a tum avanga MNF min puhna hi thu belhchian dawl lo a ni. MNF sawrkarin buhfai rate tihpunna order a siam chu rawn lek chhuak rawh se. Keini chuan mipui dinhmun zirchiang chung zelin buhfai rate hi kan sawrkar chhungin kan tipung lo,” a ti.
Phuldungsei (Zampui Tlangdung) chu Mizoram state chhung ami a nih angin MNF sawrkarin ration card a pe a, village council pawh an pe tih Tawnluia hian a sawi a. Ration Card Management System (RCMS) ah verified & approved vek niin, heng ration card ZPM sawrkarin a paih chu hnam inpumkhatna atana pawikhawihna lian tak a ni a, MNF chuan an pawm thei lo tih a sawi. Tripura-in an state-a rin luh an tum pawh Mizoramin a laklet leh hma chu MNF chuan an bei dawn tih a sawi a ni.
IR Batallion pali din belh chu Zoram tan thil pawi ber zing ami, tiin, tuna chief minister ni ta hian a sawi thin tih deputy CM hlui hian sawiin, “Kan ramin kil hrang hrang atanga beihna a tawh dan leh venhimna kawnga chak zawka kan pen nan Police Modernisation Scheme hmanga IR batallion pali central puihna hmanga kan din thei kha a lawmawm a; thalai sang tam tak tan eizawnna siamsaktu a ni bawk. Venghimtu kan neih belh azarah Assam nen kan inkar buainaah pawh kan huaisen lehzual phah thei a ni,” a ti.