KAN RAM POLITICS-AH KOHHRAN A PAWIMAWH FO

H.Lalchhuanliana

Khawvel ram zau zawk chu sawi loh, kan Mizoram chheh vel- Myanmar, Bangladesh leh Manipur ram tun lai boruak atang ngawt pawh hian ram rorelna dik lo nghawng pawi dan chu kan hre tlang vek awm e. Tharum thawhna chhuakin dan leh thupek ken kawh theih loh khawpin an buai a ni. In leh lo mai ni lo, mihring nunna hlu tak thlengin a tuar a, mi tam tak an raltlan a, mi engemaw zat chu kan lo dawng ve a ni. Heng zawng zawng intanna hi Politics dik lo vang a ni a, pawi sawi lo mi tam tak thlengin thah an ni a, Kristian biak in thlengin tam tak tihchhiat leh nghaisak a ni bawk. Heng sahimna zawnga raltlante lo dawng thei dinhmuna keini ram tereuhte kan awm hi Pathian khawngaihna vang chauh a ni a, lawmthu i sawi ang u. Kan ram roreltute hi duh khawp lo hle thin mah ila, Kohhran hoten bang lo va kan tawngtaisakna avangin tun hun hi kan thleng a ni tih hi pawm bawk ila.Kan ram hruaitute leh Politiciante pawh hian kan thenawm ramte atang hian rorelna dik lovin a nghawng pawi zia hi hre reng se, rorelna dik, kan sakhaw zirtirna mil rorelna hi kalpui ngei teh se.Lalna leh thuneihna neitu chu Pathian a ni tih ringtute kan ni a, a duh loh zawnga ram rorelna kalpui hi a hmuingil ngai lo vang tih hriat reng a tha ang.
Mizoram buai hre pha chin chuan kan ram buai intan dan leh ram buaiin a nghawng hrehawm zia kan la hre vek awm e. Kan ram buai a lo reh theihna atana hmanraw tangkai berte zing ami chu kan Kohhran mipuite leh hruaitute kha an ni. Remna leh muanna a awm theihnan nasa takin kan tawngtai a, Kohhran hruaituten Palai hna an thawk a ni tih hi thangtharte hian i hria ang u. Politiciante chuan remna thlentu nih inchuh thin mahse, Pathianin Kohhran mipuite dilna leh an Palai hna thawh kha chhangin ring lo mite rilru nen lam a hneh a ni zawk ang. Mi rintlak tak pakhat sawi dan phei chuan, zalenna sualtu hotupa khan an chhuah dawn khan kan sakhaw puithiam pakhat hnenah, a tul huna Palai hna thawk turin a chah an ti. Hei hian Kohhran hruaitute hi ram rorelna kawnga an pawimawh zia a tilang chiang leh zual awm e.Vawiin thlenga Kohhran inzawm khawm pawl tha tak MKHC leh rorelna tha thlen duhtu MPF, Synod Social Front Committe kan la nei te hi kan vannei takzet a ni.Kan ram rorelnaa Kohhran hote pawimawhna hian hriat reng leh ngaih pawimawh hlawh zel se, Kohhran pawh hian ram rorelna tha a awm theihnan tan la zel teh se.
Kum 2023 MLA in thlan hma khan inthlanna thianghlim leh ram roreltu tha dilin Kohhran ho kan tawngtai nasa a nih kha. Kohhran mipuite mai bakah kan Pastor rual thahnem ngai leh ram vei zual ni a ngaihte phei chu rorelna dik lo hnawl a , roreltu tha leh mi dik thlang turin a ruh langin an au chhuak hial a nih kha.Heng Pastor ho zinga mi palite thusawi pawh 15th April 2022 ah leh 17th April 2022 khan Vanglainiah leh The Aizawl Postah a chhuah nghe nghe kha. Khang Pastor palite au chhuahna hmun kha Kohhran Inkhawmpuina hmunah a ni a, lawm leh sawi zui pawh a hlawh hle a nih kha. Kan thupui ka vuah chhan pawh hi Kohhran au aw bakah Pastor rual thusawi nghawng ni ngeia rin zawn theiha Politics boruak hmuh theiha a lo danglam ta khan Kohhran pawimawhna a tilang hle a ka hriat vang a ni. Kohhran Pa kan tih hial John Calvina khan ram rorelnaa Pathian thuneihna hi a ngai pawimawhin a dah sang hle an ti a.Kohhran leh Politics chu Pathian thu hnuaia awm vek, inchawm tawn tur leh rawng inbawlsak tawn tur niin a ngai a, Geneva khawpui siam that hna pawh kha Pathian thu hmangin a thawk a ni an ti.Pathian thu thiam N.T.Wrighta pawhin Kohhran chuan sawrkar lakah thu dik hriattirin eptu pawl nihna a vuan tur a ni a lo ti a. Ram rorelna chu Pathian thu anga a kal loh chuan Kohhranin siam that hna thawkin huaisen takin hma a la tur a ni, tih hi kan State angah chuan kan kal dan tur a ni ang.
Kan Pathian thu thiamte zing a mi Pastor thenkhat thusawi tlangpui chauh kha han tar lang leh ila. Kristian rama rorelna kalpui dan tur leh kan ram dinhmun an hmuh dante kan hriat thar leh a, insiam thatna atan hmang duhte kan awm mial takin aw.
1.Revd Chuauthuama (RIP)-K|P inkhawmpui Kolasibah khan ‘ Tunlai thil awmzia’ tih thupui a sawi a nih kha.Kan ram hri vei Puam pali – Chiahpuam, khehpuam, leipuam leh kuhva phurhpuam avanga kan ramin a chhiatpui mek thu sawiin thalai rualte chu hetiang laka fihlim turin a chah a.Tangka sum ngainatnain min chiah hneh nasat tawh thu sawinan, thluaka khawsik lut chu a tihdam theih laiin thluaka sum lut erawh chu a tihdam theih tawh loh tih thute a sawi a nih kha. Kan State thenawm hruaitute hnathawh that a awh thu leh kan ram hruaitute erawh chuan a sawi chauh an thiama, a tak hmuh tur a tlem thu a sawi a.” Titia dinstinction, hna thawha third class” tihte; kawh kual mai maia a tak hmuh tur awm si lo ram hruaitu hi thlak an hun tawh a, hna thawk thei mi dik ram roreltu kan mamawh tih thu a sawi a nih kha. Nehemia anga mi rinawm kan mamawh thu sawiin, ‘Nehemia ka ngai mang e’ a ti nghe nghe a ni.Hei bak pawh hi thu tam tak a sawi a, thalai rual sing chuang zinga a thusawi khan awmzia a neiin kum 2023 MLA inthlan result kha a chhannaah kan pawm thei em le?
2. Rev MS Dawngliana- Ni 23.11.2022 MPF Annual Meetinga a sawi hi tlem tar lang ila.”Party ruih chilhin ram leh mipui a nghawng dan” tih thupui hmangin thu a sawi a. Party ruih chilh ho chuan ram an hmangaih pha lova, party bil chauh an ngaihtuah thin.Party bil chauh ruih chilha hleih nei taka rorelna hi Pathian pawi sawina a nih thu a sawi a nih kha. Kristian ramah hian Bible pela ram rorelna kalpui a nih chuan Pathian malsawmna kan dawng lo vang tiin Party bil politics ruih chilh that lohzia a sawi.Insiam tha turin sawmna a siam bawk a nih kha.Party bil politics ruih chilh hi kan bansan a tul a nih chu.
3. Rev Dr R Lalbiakliana-Ni 12.2.2023 a Mizoram Baptist Mipa Pawl(MBMP) Inkhawmpui, Hnahthiala an neih tuma “ Ram leh hnam tan min tiharh leh rawh “ tih thupui hmanga a sawi thenkhat lo tar lang leh ila. Kan ram siam tha tur hian Nehemia anga mi rinawm , eirukna laka fihlim ram roreltu kan mamawh thuin bul a tan a.Kan rama eirukna nasat tawh zia leh kan ram ngawte kan tihchereu chakzia sawiin, kan ram hi nau chhiatna ramah kan chantir mek a, kan tu leh fate tan hian chenna tlak a la ni zel em tih ngaihtuah a tul thu a sawi a ni. Revd Chuauthuama ang bawkin thenawm ram ring lo mi hruaitute hnathawh that thu leh a rualawh thu a sawi a. Kan ramah chuan kan hruaitute leh sawrkara mi lian hote hi kan ram tichhetute an nih mek thu a sawi hmiah mai a ni. Kan ram hmasawnna tura kan pawisa hmuh hi a tam thu a sawi a. Kohhranin a nihna tur ang taka sum a hmang thin ang hian hman ni se, kum khat chhung pawhin kan ram hi sang taka kan dah theih tur thu a sawi a ni. An Kohhran chuan thawktute hlawh a hun taka an pek thin thute a sawi a, sawrkar chuan ram enkawl an thiam lo a nih chuan BCM hi term khat min enkawltir ula, a tha em em ang a ti hial a ni.Ram rorel mek tute leh rorelna chan tumte zingah pawh Nehemia anga mi rinawm chauh lo chhuak rawh u, tih thu a sawi phei kha chuan kut beng thawm a ring hle a nih kha. Party bil ruihchilha, an that lohna hre reng chunga zui tlat hi ramin a chhiat phah a, chutiang mi chu tlansana mi rintlak tur ngei thlang thin turin mipui a sawm bawk a ni.
4. Rev KL Biakchhawna – Ni 12.3.2023 a BCM Assembly vawi 127 na ah khan “Diknaa rorelna hmun a ni” tih thupui hmangin ram rorelna lam hawi zawngin thu a sawi a. Kan ram budget-in mi rethei zawkte a thlen phak loh thu uar takin a sawi a. Ram hruaituten kan budget thau an sawka, a hnuai a miten an sawk leh a, mi retheite tan thau sawh ve tur a awm lo . Aizawl khawpui aiin Lunglei chu nasa takin a cher a, kawng pawhin a chhiat phah vek a nih hi a ti a. Contractorte pawh hlep tam lutuk tum lo tur leh contract hna hralh chhawn tam lutuk hi hna chhiatna a nih thu a sawi a, sawrkar hnathawkte pawh hlawh tam tak nei chunga dik lo taka neih belh zel tum lo turin a chah a ni. Kan rama case tam chhan pawh dan leh thupek ken kawh a dul lutuk vang a ni a, misualte hian an sual man hmu ngei se a duh thu a sawi. Kan ram hi mi sual leh pamhamte vanramah kan siam mek a, a zahthlak lutuk, heng ho hi Kristian pawh an nih ka ring lo, ti hialin sualna a zalen thu a sawi.
Thawhrim rah mausama, sum awlsam hmanga nun hman hi natna chi khat hlauhawm tak, mimal, kohhran, khawtlang nun leh kan rinna thlenga tichhe theitu a ni a ti bawk. Ram hruaituten Krista hi lu bera an neih thin loh avangin ram rorelna a that theih loh thin thu a sawi a nih kha. Kawh kual mai maia a tak hmuh tur awm si lo pawi a tih thute, kan ram mite aia hnam dang duhsak bik neih hian mi rethei zawkte thlenga nghawng a neih thu leh thil dang tam tak a sawi a nih kha.