SUSTAINABLE, INTEGRATED FARMING IN MIZORAM – 38

RK Dawla
Mb 9366095658

1. September thla tawp lam niin, naktip mai, nilaini (23rd.Sept.) hian chhun leh zan inchen hun kan thleng leh chiah ang a. A tuk atangin chhun lam aiin zan lam a rei telh telh ang. Pi leh pu atanga Vangpui lunglen kan tih thin chu a intan dawn ta tak tak e. Lui kal, ram vah, intawllen etc a hot chho leh tan ang a. Thlasik thlai (rabi crops) chingtute tân erawh buai vanglai a intan chho chiah ang. Tin, air gun/air rifle tha tak tak, scope man tam nena thuamin, sava veh rûk case a hluar chho leh hun a ni chiah bawk. Farmer-te tân chuan, hêng sava kahna silai tha pui pui lek chhuak thin hote hi an huatthlala riau a. Kan thlai leh sangha tâna hnawksak thin pît leh vasuih te, vaki rual te kâp lo hian, thlai eichhetu rannung min vehkhawmsaktu sava dang tangkaite an target mauh thin a. Sawrkar hian heng sava silaite hi khuahkhirhna dan khauh tak siam se a duhawm tawh hle. A thuhrimin, kan ram timawitu leh kan ecology keng nungtu pakhat chu, savate an ni a. Mipui mimir hian humhalh nachâng kan hriat a hun tawh hle.
2. Mizoramah hian, sik leh sa leh rura ang reng tak leh, leilung dawrawm tak kan nei a. Chutih laiin Pathianin keini leh kan leilung mal a sawm a, sawi tham kan la thar mai mai zawk a. Tlo leh daihrei, hlawk zawka leilung enkawl kan zir thiam a pawimawh ta hle. Kan leilung chhe zel leh kan thlaite enkawl nâna vai leitha leh tûr chi hrang hrang kan hmang thinte hi sawrkar laipui chuan a vei hle mai a. Natural Farming chawilarin Bawng zun leh êk hman tangkai lamah tan a la thar hle. Mizote erawh kan danglam a. Pi leh pu atangin Bawng vulh hnam kan ni lova, vawiin thlengin Bawng leh Mizopa thisen hi a la inzawm nghet hlei thei lo. Bawng ni lovin, Sial vulh zawk thin kan ni a, vawk leh âr nên. A awmzia chu Central programme tha tak, Zero Budget Natural Farming kan tih hi Mizo nawlpui tân, kan rilrem lohzawng a ni, Bawng zun leh êk a ken tel miau avangin. Bawng vulh kan tam miau loh avangin, Bawng zun leh êk hman tangkai piah lam, ran dang zun-êk hmang tangkai tel zawnga kan herrem thiam a tul hle. Thlai leh leilung chawmna tura leitha pêk piah lamah, kan leilung hrim hrim enkawl dan pawh hi danglam bik deuh a ngai a. A nihna takah chuan, tlo leh daihrei tura Mizoram awihpang enkawl dan zirchhuah hi a harsa khawp mai. A taka zirchiang a, bawngtuthlawh leh chemkawm nêna han beih tak tak chuan. Ngaihnawm tak chuan, a ziah chhuah theih a, a sawi theih mai. Mahsela, a takah, a thawha thawh râlah hi chuan har ve ngang ngang tak a ni!
3. Kan thlaite enkawl nân organic leitha a tha ber a. Chutiang siam tur chuan, ran zun-êk kan hman tangkai a ngai a. Hman tangkai tham ran zun-êk nei ve lo tân, vai leitha hman mai loh chu, kawng a vâng kan lo ti mai thei. Mahsela, hei hi thu lawmawm chu a ni. Kan choka ningnawi leh kan fur hnim leh hnahthel tlate hmang hian, leitha (compost) kan siam thei e. Tlangram leh leileta kan buhpawl leh fafute bâkah kawngkam leh ramhnuaia hnahthel tlate hi hmanraw tha ber mai, No 1 category an ni tlat a. Hnim nise, hnawksak tham, a in-a-ramin kan nei reng a. Hengho hmang tangkaia leitha quality tak siam dan inzirtirna (training) kan kalpui thin a. WhatsApp group hmangin kan inzirtir mai thin a. Foreign atang leh kan University & College zirtirtute chenin an rawn zir thin a. A tam zawk ngial chu, tlang hrang hranga farmer-te an ni. Kan hmanraw neih ang angin leitha siam kan inzirtir a, technology mumal tak hmangin. Theory hi ni 7 chhung vel zirin, a bâk chu mahniin practical-a siamin WhatsApp hmangin kan inkaihruai tawh thin. Hetianga kan leitha siamte hi thla 1 chhungin a thar hman a, a siamchhung a rei lovin, Mizorama kan organic leitha hmuh theihah chuan No 1 a ni. October ni 1, 2026 hian Course kan tan leh dawn a. Course fee hi mi pakhat zelah Rs. 2000/- niin, hralh tur êm siam thei lo tân pawh, mahni hman tur leitha kan hnaivaia hmanraw remchang hmanga siamin intodelh kan tum tlat thin. Hrechiang duh tân, phone number 9366095658-ah hian Call or WhatsApp-in zawhfiah theih reng a ni e.