A thianpa tui tla chhanchhuak

Sialsuk ami Lalrinmawia (15) s/o Rotlinga chuan Lallawmawma (15) s/o Lalfakawma Varte, Chamring ami tui tla a chhanchhuak.
Thudawn danin kumin August 7 chawhnu khan Sialsuk High School-a kal, thian ho pali chu an school bang Sialsuk tlanga YMA Tuikhuahah an cheng a, a thuk lam an pan laiin an zing ami Lallawmawma, pawl 10 zirlai hi a chau thut a, a talbuai zui a, a thiante pathum hian vuan betin puih an tum a, a ni talbuai laklawh hian a invai nasa a, an chelh bet hleithei lo a ni. An zing ami Lalrinmawia, pawl 9 zirlai hi a chauh deuh tawh avangin vaukam lam a pan a, a thiante pahnih pawh hi an chauh tawh avangin vaukam lamah an insaseng ve leh a, lo awm hahdam deuh tawh Lalrinmawia hian chhan tumin a pan tha leh a, hetihlai hian Lallawmawma hi a pil tawh a ni.
Lalrinmawia hian a khabe ah dawmin nikhua hre tawh Lallawmawma hi vaukam lamah a hleuhpui a, vaukama awm a thiante hian lo pui ve bawkin, thawk tir leh tumin an thiam ang angin an bei a, nikhua a rawn hre chho leh ta tih thudawnna chuan a sawi. Lallawmawma hian a thuk lam an pan lai hian a chawn tha a chat a, a talbuai zui ta mai niin a sawi.
Hetianga an chetsual thu hi an sawichhuak mai loa, tunhnai deuh maiah an chhungte pawhin an hre ve chauh a, YMA Sialsuk South Branch hruaitute beng pawh thlengin, an ni hian August 16 zan khan Lalrinmawia huaisen chawimawina an hlan a ni.