Ration card siamthat mek mipui en theihin tar dawn

Ration card siamthat mek
mipui en theihin tar dawn
Sawrkarin Aizawl khawpuia chengte ration card a enthat mekah complaint duh tan complaint theih turin vantlangah tarchhuah hmasak a ni dawn tih Supply minister B Lalchhanzova chuan a sawi.
FCS&CA minister hian Inrinni khan Edenthar Venga Basic Service to Urban Poor (BSUP) a awmte tlawhin, BSUP-a cheng mek thenkhat NFSA (ration card eng or card pawl) a awm ngei tur, awm si lo an awm em tih a enfiah. BSUP-a cheng zinga card var nei an lo la awm chu pawi a tih thu sawiin, miretheite quota buhfai man loa semte mirethei awmkhawmna BSUP-a awmte zingah chang ve lo an awm chu thil pawi tak a ni tih a sawi.
BSUP-a chengten hmun hla tak taka ration an khul thin pawh an kawtkai ngeia ration an khul theih nan hma an la dawn tih a sawi bawk.
Card eng leh pawla awmlo tur awm mekte, dinhmun thaa dingte card vara thiar chhuak turin hma lak a ni tih B Lalchhanzova hian a sawi a. Aizawl Municipal huamchina ration card enthat mek hi mipui hmuh theih turin veng tinah tarchhuah a ni anga, complaint duh tan complaint theih hun hawn a ni dawn tih a sawi a ni.