Kawng chhia siam phutin maxi cab service dawn lo

Lunglei thlanglam khua, National Highway 302 kawng zawhtu maxi cab 100 chuang chuan kawngpui a chhiat lutuk avangin siamthat phutin tiamchin awmloa tlan loh an rel a, vawiin – August 19 atang hian an tan ang.
Lunglei Thlang Joint Maxi Cab Association thuchhuah danin, NH 302 kawng zawhtu hi maxi cab 100 chuang (Welfare pali leh Welfare hnuaia awm lo khaw 10 vel) an awm a, kawng chhiat vang hian maxi cab hmanga eizawngtute an rum nasa a, vawikhat an kal chuan an lirtheiah chhia engemaw siam zel a ngai a, motor part man a toin an enkawl zo lo tih an sawi.
Lirthei an nawr emaw an pawh emaw loh chuan Lunglei an thleng thei meuh lo thin nia sawiin, lirthei chetsualna vanga nunna chan ta, damlo na tak tak, damdawi in an thlenpui hman loh chang pawh a awm fo a; kawng chhiat avang hian lirthei tang an nawr na lama chesuala nunna chan pawh an awm tawh tih an sawi. Heng vanduaina tawkte pawh hian zangnadawmna an phu takzet tih an sawi bawk.
Hei vang hian nikum lam atang khan association chuan nasa takin tan an la a. NGO hrang hrang bakah sawrkar official-te thlengin tanpui an dil tawh thin a. Heti chung pawha hmasawnna tih tham an la hmuh loh avangin August 19 atangin tiamchin awm loin maxi cab service tihtawp an tum tih an sawi. ‘Mipui kan him zawk nan leh a thawktu contractor-te, sawrkar hruaitute heng kan harsatna hi ngaipawimawh a, a rang thei ang bera hma la turin kan ngen a ni,’ a ti.
An service loh chhung hian kawng siam hna thawktute an ngaihven reng dawn a, hmasawnna an hmuh veleh a hma thei ang berin an service theih hun an hriattir leh dawn tih an sawi a ni.