Thuhretua tan a hautak an ti

Sawrkar hnuaia ruihhlo kaihhnawih mantuten thuhretua an hman thinnaah sum an sen na hmuhlet leh mai tur a awm loh thin avangin an tan a hautak tan hle a, sawrkar thuneitute hnena thlen phawt a, a tul angin ngaihtuah that nise tih YMA Sub Hqrs. Serchhip chuan an sawi.
YMA Sub Hqrs. Serchhip hnuaia Anti-Drug Squad leh YMA branch thenkhat chuan, ruihhlo kaihhnawiha man an neih chângin Excise & Narcotics leh Police chuan thuhretu an hmang a, thubuai hi District & Sessions judge awmna Aizawla ngaihtuah thin niin, a kal man an dawn tur an dawn theih mai thin loh avangin thuhretua tan reng a harsa tih an sawi. Chief minister leh Law minister hnenah emaw court lam thuneitute hnenah emaw sawi nise, sum hi tun ang renga dawn a harsa a nih chuan la ngaihtuah nawn leh nise, an ti.
YMA Sub Hqrs. Serchhip executive thukhawm chuan, YMA rorel inkhawmpui agenda tur an sawiho zingah ruihhlo do kawnga chak zawka hma lak rawtna, village council term kum 5 chu kum 3-a titawi tura hma lak rawtna, fa nei tam tura hmalak rawtna leh NHIDCL kawng siam chhe lutuk siamtha leh tura nawrzui rawtna an telh a. Raltlante khuahkhirh dan tur leh tuihna humhalh kawnga hma lak dan tur an duang bawk.