Assembly Session atan dan siam tur 5 leh zawhna 280 a lut tawh

Naktuk, August 20-a tan tur Mizoram Legislative Assembly fur thukhawm atan sawrkar atangin dan siam tura duan 5 a lut tawh a. Zawhna 280 lut tawh bawkin a tam zawk hi House chhunga chhan chi a ni.
August 16 thleng khan Assembly Secretariat chuan dan thar siam tur pakhat leh dan dinglai siamthat tura rawtna pali a dawng tawh a. House chhunga chhan tur chi (starred question) 263 leh ziaka chhan chi (unstarred question) 17 a lut tawh. Social Welfare & Tribal Affairs minister Lalrinpuii hnen atangin official resolution putluh tur an dawng tawh bawk.
Assembly thutkhawmah hian MLA hlui, Gorkhali hnam zinga MLA atana ruat hmasak ber leh awmchhun Kapoor Chand Thakuri sunna hun hman a ni dawn a. Kapoor Chand Thakuri hi kum 1972-a Mizoram union territory a nih ruala Assembly neihah Saptawni leh Lalhmingthanga te nen ruat seat-ah, khatih lai a Mizo Union sawrkar khan a dah a. Kumin July 15 khan Nepal khawpui Kathmandu-ah a thi a ni.
Session hi August 20-a tan turin larsap Dr Hari Bambu Kambhampati chuan a ko a. August 1-a Assembly speaker Lalbiakzama kaihhruai Business Advisory Committee thukhawm chu thutkhawm hi ni hnih August 20 & 21 a neih turin a rel a ni.