Fehchhuah Runpui leh a behbawm…
Tun laiin sawhthing a tâm a, horticulture department chuan ‘Operation Ginger-2024 Fehchhuah Runpui’ neiin kar kalta Zirtawpni khan horticulture department changtu minister chuan Aizawl, Serchhip, Hnahthial leh Saitual district-a feh chhuak turte a vai liam a. Fehchhuah Runpui hi district tina kalpui tur a ni.
Tuna report hriat theih chinah khua 263-a sawhthing chingtu chhungkaw 25,102 zinga chhungkua 6,586 (26.2%) te sawhthing a tâm mek a. Mizoramah sawhthing quintal nuai 10 (MT 1,00,000) thar chhuak tura beisei a ni a, sawhthing tharchhuah hi a tlahniam viau dawn ta niin a ngaih theih.
Sawhthing tâm hi nasa viau lo se, hetiang Fehchhuah Runpui ang hi neih a ni kher ang em tih ngaihtuah theih tak a ni. Loneitu tanpui ngaia awmte tanpui tur leh, harsatna khur atanga khai chhuak tura horticulture official-te an han phe suau suau mai hi hmuh a nuamin a ropui dangdai ve viau mai, ‘Mizoram ang tan chuan.’
‘Mizoram ang tan chuan’ tih kher hi a thanat thlak deuh a nih pawhin, inenlet nana kan hman thiam a pawimawh hle awm e. Kan hriat angin horticulture department chu thlai chingtute puitu, Mizorama thlai chingtuten hlawk zawk leh quality tha zawka an tharchhuah theihna tura puitu tur a nih rualin, loneitute tharchhuahin state economy a chawisan theihna tura ‘kut berh’ a lei diak ham bawrh bawrh thei tur, chutiang hnathawh dan pawh kum tam tak lo zir a, lo zirchhuak tawh, an thiamna leh theihnate avanga sawrkar pawhin hlawh tha tawk tak pea a rawihte an ni a. Tuna Fehchhuah Runpui ang hi kum khat chhung pawha tum engemawzat nei thin tura beisei tur an ni hial awm e. Horticultre department chauh pawh a ni lo, agriculture te, sericulture te, fisheries te, AH&vety te pawh office building hul hliap chhung aia pawn lama hun hmang tam zawk tura ngaih leh beisei tur an ni awm e.
Department dang ziangah pawh, pawn chhuaka hna thawk chi an awm a, chungte chu PHE, P&E & PWD te hi an ni. Heng department-ah te hian, thiamna nei sâng sâng hi inchhungkhung tlatte an ni zawk mai em tih te pawh a ngaihtuah theih rum rum, a chhan chu ram danga engineer rual ten lukhum êng khum chunga office pawn lama an naute an kilkawi dan kan hmu ve kur hlawm si a, hetianga thawk ve suau suau tura beiseina hi a lian hle a, ni tina fehchhuah runpui nei mai tur awma mawi an ni awm e.