Khualzin chhawntute hriat tur zirtir

Mizoram Tourism department leh sawrkar laipuia Ministry of Tourism tangdun buatsaih Paryatan Mitra program chu Thawhtanni khan Aizawlah neih tan a ni.
Paryatan Mitra programme hi Ministry of Tourism-in tourism hmasawn nan leh he industry-a eizawngten nasa lehzuala tourism atanga sum an hailuh theih nana duan a ni a. He scheme hnuaiah hian India ram chhunga hmun pasarih pilot project tura thlan niin, Aizawl district pawh a tel ve a ni. A thawh khatna atan khualzin mite lo chhawn leh buaipui zuitu, tourist service provider-te hnenah training pek tan a ni a. Training hi ni hnih awh tur niin, stage khatnaah hian taxi driver-te zirtirna pek an ni.
Training hawnna hmanpuitu Tourism secretary Dr Lalrozama chuan service provider-ten Mizorama tourism industry tilian turin hmun pawimawh tak an luah tih sawiin, nasa taka tang chho turin a fuih. Tourism department hmalakna chu tlang taka mipuiin an hman tangkai zawk dan leh tourism chu kan ram ei leh bara a lo intodelh theih nan bakah tourism hnuaia eizawnna chu huapzau tak a nih avanga a pawimawh zia a sawifiah bawk.
Training hmanpui hian Ministry of Tourism regional director Anil Oraw, IITTM Bhubaneswar professor Dr B Sawjan leh Central Institute of Hotel Management head of department Dr Hemanshu Baishya te an rawn kal a ni.