Sawrkarin Lunglei lakah tha ba rulh tur a nei tam

ZPM sawrkarin Lunglei mipui lakah tha ba rulh tur a nei tam tih chief minister Lalduhoma chuan a sawi.
High Powered Committee Lunglei chu an chairman, chief minister ho hian Thawhtanni khan a office-ah an thukhawm a. Sawrkarna an kalpui hnu lawkah MP inthlan puan niin, model code of conduct hman a ni a, an tum angin HPC an thukhawm hma thei lo tih a sawi a. Tunah Aizawlah bul tan mah se, nakin zelah Lunglei lamah an la thukhawm dawn tih a sawi. “Lunglei mipuiin min duhsak zia kan hria a, mitin kan hmu. Sawrkar hian mipui lakah rulh tur tha ba tam tak kan nei tih hi kan hria a ni,” Lalduhoma hian a ti.
HPC dan anga kalpui, dan (legislate) tura hma lak an rel bakah Lungleia Multi Level Car & Smart Parking leh Ring Road project siam an rel. HPC Fund hman dan phung pawh tlem tihdanglam an rel a. Heng bakah hian Serkawn Bazar Shed thar sak, agricultural link road laih, Mizoram chhim lama airport siam leh thil pawimawh dang an sawi bawk.
Thutkhawmah vice chairman V Malsawmtluanga, MLA leh HPC member dang, MLA pahnih – Lalramliana leh T Lalhlimpuia bakah member secretary, Lunglei bawrhsap R Lalthazuala leh non-official member te an tel a ni.