Vahui Online Portal

Health & Family Welfare Department hnuaia office hrang hrang leh damdawi inte laka vuivaina leh lungawilohna thlen duhte tana online hmanga thlen theihna tur Online Grievances Redressal Portal ‘Vahui’ tia vuah chu nimin khan H&FW minister chuan a tlangzarh a; hei hi department tana hmasawnna chhinchhiahtlak leh chona thar petu tur a nih thu leh, Vahui chu mipui leh health department inkara palai hna thawk tur, harsatna leh lungawilohna hrang hrang nei, kalna tur leh puitu tur hre lo tam takte tanpuitu tur hmanraw tangkai tak a nih a beisei thu health minister chuan a sawi a ni.
Vuivaina leh lungawilohna lutte hi ni 7 chhunga chinfel hman tur niin, chinfel a nih loh chuan a aia thuneitu sang zawkah thlen a ni ang a. Chinfel dan hi portal-ah en theih tura dah tur a ni bawk.
Health & Family Welfare Department hnuaiah hian tunhma deuh atang tawh khan sawi leh sep a awm thin a, a tlangpuiin damdawi in, district hrang hrang civil hospital-ahte a hluar deuh. Damlo leh damlo awmpuituten eng eng emaw sawisel tur leh phunnawina tur, lungawilohna an neihin thuneitute hnena thlen mai lovin, fakselnaah te, social media platform hrang hrangah te an thehdarh a, thuneitute beng a han thleng a, chhui chian a han ni a, a chang chuan lungawilohna neituten thil awmzia an hriat chian tawk loh vang te a lo ni thin a. Mipui lam chuan a nihna dik tak an hriatzui ve zel tawh thin loh avangin damdawi in lama thawktute hmuh khawloh phah nan te an hmang zui thei mai dawn tihna a ni.
Hengte hi thil kalhmang a nih thin avangin, damdawi in lam enkawltute pawhin langtlang taka thiltih duh vangin complaint box te an han hung a, social media lama phunnawina a tam thin ang huin complaint box-ah complaint a lut tha leh vak chuang lo thin.
Chuvangin, mipui lam pawh hian, lungawilohna kan nei a nih pawhin, pawn lama thehdarh kual vel mai mai lovin, a siam dik hna thawk tura a kaihhnawih thuneitute kan pan chat chat hi kan tihtur a nih hmel a. Tuna Vahui Online Portal siam a nih chhan pawh hi, mipuiin tha taka health service an dawn theihna tura tih a ni a, a tangkai thei ang bera hmang tura kan inbuatsaih a pawimawh hle dawn a ni.
Hetih rual hian, damdawi in thawktute pawh, mihring nunna hlu tak enkawltu an nihna hrechiang lehzual tura an intuaithar ve thin a pawimawh hle a ni.