Anthurium Festival leh a behbawm….

Ni thum awh tur Anthurium Festival chu Reiek leh Ailawngah October ni 1-3 chhunga neih tura ruahman a ni a. Festival-ah hian cultural programme bakah adventure lam hawi – trekking, cave exploration, silai inkahsiak leh, naupang infiamna, pangpar huan tlawh tur te, Mizo Infiamna chi hrang hrang entir leh festival chhimtute tana tel ve theihna tur thil chi hrang hrang siam tum a ni a. Mizo zaithiam lar te sawmin Leikapui Night leh a kharna concert ropui tak buatsaih tum a ni.
Kan hriat angin, Anthurium Festival hi Ministry of Tourism-in ram chhunga tourism tihhmasawn nan leh State/UT te hnena Fair/Festival/Event buatsaih nana Central Financial Assistance (CFA) a pek hmanga buatsaih a ni thin a, a scheme hming hi “Domestic Promotion & Publicity including Hospitality (DPPH) Scheme” tih a ni. Mizoram pawhin he scheme hnuaiah hian Anthurium Festival bakah |halfavang Kut te, Winter Festival te kan lo buatsaih ve a ni.
Anthurium Festival hi 2006 atanga kalpui tan kha a ni a, kumin hi tum 20 kan hmanna tur a nih laiin, Covid vangin tum khat chawlh a ni a; a hnu 2024 leh 2025 khan a hranpaa hman a ni lo a, Chapchar Kut nen chawhpawlh a ni. Tichuan, a hranpaa Anthurium Festival kan hman chu tum 17 (virtual te nen vek) tihna a ni ta a. A hmun thuah hian, Reiek Tourist Resort-ah ngar ngar nghah a ni thin a; kum 2015 khan Lengpuiah tum khat sawn chhuah zawk a ni.
Sawrkar laipui atanga Financial Assistance kan hmuh dan hi, 2006-2011 chhung khan tum khat festival buatsaih nan cheng nuai 10 zel kan dawng a. A hnu kum 2012-2014 chhungin nuai 15 zel, kum 2015 atangin cheng nuai 25 a ni chho ta ngar ngar a ni.
Kum kha leh chen sawrkar laipui sum ringa khualzinte hip tura festival kan lo buatsaih thin kha eng ang takin nge kan hlawkpui tak(?) tih hi zawhna hmasa ber tur a nih a rinawm. Anthurium Festival laia hnamdang hmel kan hmuhte kha a tlangpuiin central sawrkar hnathawk Mizorama awm mekte bakah khualzin tangkhang laklawhte an ni deuh mai a, Anthurium Festival chhim tura state pawn atanga lo kal vang vang kha sawi tur an awm lo a tih theih ang. A nghahna hmun hi Reiek a ni a, Reiek khaw pawn atanga Anthurium Festival chhim tura kalkhawmte hi kan duh chuan ‘domestic tourists’ ti te pawhin kan vuah chawp nawk nawk thei tho mahna le! A nihna tak tak (ground reality) ah chuan, he festival hian khualzin mite a hip lo va, tualchhung mite chauh a hip, i ti mai ang u.
Tuna rel kawngin min rawn luhchilh thuk tak hnu hian khualzin an lo pung a, social media te a lo chak tak bawk avang hian, kan mikhualte hian kan insenso leh hahpui vak ngai lo hian tourism chawikanna kawngah tha an thawh nasa ta hle a, exposure chak zawk a thlen phah a, heng kan mikhualte hi Mizoram tourism ambassador-ah an leh tan ta hlauh a, kan vanneihpui chho mek a ni ber e.
Tuna Anthurium Festival pawh hi, mikhual chambang mek tam tak hian an chhim ngeiin a rinawm a, an vawikhat chhimna tur a nih hlawm dawn avangin an ‘First Impression’ a pawimawh dawn tih kan hriat khiau a tha awm e.
Mizorama khualzin pun chhoh dan han en hian, mikhual thlenna tur (hotel/homestay/tourist lodge etc) lamah nasa taka tan lak kan ngai tih a lang nghal bawk. Chumi ruala pawimawh leh chu ei leh bar leh hmunhma faina leh thianghlimna hi a ni. Ram dang angin infrastructure ropui leh hmuhnawm heng – Eiffel Tower ang te, Burj Khalifa etc. ang te hi kan nei ve lo; keini hralh tur chu – sik leh sa boruak thianghlim leh nuam, kan hmunhma mawina bakah hawihhawmna te, thianghlimna te, khualchhawn thiamnate hi a ni.
Mizo mipui tam zawk hi tawng dang thiam lo kan nih a rinawm; mikhual kan be thiam lo a nih pawhin hlim hmel tal kan lo hmuh thiam hi khualzinmite hipna pawimawh tak a ni tel bawk tih hi kan hriat thar leh a pawimawh bawk awm e.