February 21 khan India Unified Payments Interface (UPI) leh Singapore PayNow te chu official a thlunzawm niin hei vang hian ‘real-time payment linkage’ tih mai pawisa inthawn nghal theihna chu kalpui a ni a. Singapore hi India-in ramri kana pawisa inthawnna cross-border Person to Person (P2P) payment facility a neihpui hmasak ber a ni. Kum 2021 September thla daih tawh khan Reserve Bank of India (RBI) leh Moneytary Authority of Singapore (MAS te chuan instant low-cost, cross-border fund transfer hi kalpui an tum thu an lo puangzar tawh a ni.
-- Advertisement --
A tangkaina tur?
He scheme kalpui a nih tan atang khan RBI chuan ram pahnih tena cards leh QR codes hmanga India leh Singapore tena pawisa inthawn leh thil lei an kalpui theih chuan sumdawnna, zin veivah leh ram pahniha pawisa lut leh chhuak awlsam zawkin a siam dawn an ti a. He ruahmanna hi sorkarin UPI-based payment ecosystem tihchak a tumna kal zel a ni a. January 2023 khan National Payments Corporation of India (NPCI) chuan UPI hmangin international phone number tena sum an thawn theih nan ruahmanna a lo kalpui tawh bawk a. April 2022 khan Union Cabinet chuan low-value BHIM-UPI transaction incentivisation scheme a lo pawm fel diam tawh a ni.
February 2021 han Prime Minister Narendra Modi leh Singapore Prime Minister Lee Hsien Loong te chuan virtual-in khuh hawnna an lo nei tawh a. He ruahmna hmang hian Ministry of External Affairs chuan Singapore a Indian chengte a bik takin migrant workers te leh zirlaite chuan Singapore atanga India leh India atanga Singapore-ah pawisa awlsam taka inthawn zung zung thei dawnin chu chuan awlsamna nasa tak a thlen dawn a ni an ti a.
Scheme kal dan tur?
India lamah State Bank of India, Indian Overseas Bank, Indian Bank leh ICICI Bank te chuan sum lut leh chhuak an thawn thei ang a, Axis Bank leh DBS India te chuan India rama sum lut tur te chauh an la dawng thei thung ang. DBS-Singapore and Liquid Group, fintech company te chuan Sinfapore a user te tana hna an thawk rih ang a. Hun a kal hret anga bank dang te pawh he system hmang thei tur hian belh zel an ni ang, tiin RBI thuchhuah chuan a tarlang bawk.
Heng bank-a account neite chuan an UPI ID, mobile number emaw Virtual Payment Address (VPA) hamngin India tangin Singapore-ah sum an thawn thei tawh dawn a. A bul tan nan India atangin ni khatah Rs 60,000 thawn theih a ni ang a, chu chu Singapore dollar 1,000 nena inhen a ni.
Singapore a pawisa thawn tur hian bank’s mobile application emaw internet banking facility neih ngai a ni a. Indian banks te chuan Singapore atanga sum dawng thei turin opt in/opt out feature an nei vek bawk ang a.
Tun dinhmunah chuan UPI Ids heng bank a nei leh inziaklutte chauhin sum an la dawng thei dawn thung a. P2P remittance India leh Singapore tena an kalpui hi tunah rih chuan ‘chhungte pawisa thawn’ leh ‘thilpek’ ang chauha la kalpui theih a ni a. RBI chuan a tahtawlin update siamin nakinah chuan thil dangah pawh sum tam zawk inthawn theih nan siam a ni ang a ti.
India hian ram dang Indian mite tamna United Arab Emirattes (UAE) nen pawh UPI remittance hi kalpui dan a zawng tawh a. November 2022 khan India leh UAE te chuan UPI platform hmanga sum inthawn dan tur hi External Affairs Minister S. Jaishankar leh UAE Foreign Minister Sheikh Abdullah bin Zayed Al Nahyan te chuan New Delhi an an lo sawi dun tawh bawk.
Eng nge real -time payments (RTP)?
A hming ang hian, real-time payments chu pawisa thawn rual chiaha a dawngtuin a dawn nghal theihna tia sawi theih a ni. RTP te hi 24×7, 365 days kalpui a ni a. Fund transfer mai bakah payer leh payee tena communication an neih a tiawlsam em em bawk. P2P payment tih hian bank account pakhat atanga bank account danga digital medium hmanga sum inthawn tihna mai a ni. P2P payment entirna langsar deuh te chu India ramah chuan GPay leh Paytm ang te hi a ni a. P2P hmangin bank account inhrilh kher a ngai lo bawk a, chu chu a him zualna pakhat a ni bawk a. Kum 2022 January khan UPI payment Rs 8,31,993.11 crore vel zet kalpui a ni a, December a nih meuh chuan Rs 12,81,970.86 crore vel a hawlh daih tawh thung.