Ni hnih awh Assembly Session

Mizoram Legislative Assembly pakuana, session vawi thumna sitting ni hnih awh chu nimin August ni 21, 2024 khan tluang taka zawhfel a lo ni leh ta a.
A ni khatna leh a ni hnihnaah hian, zawhna leh chhanna hunah te, discussion hunah te han indinthuah deuh laih laih leh, awrawl han rin deuh changte a awm thin a. Ni hnih lek sitting ni mah se, session ngaihnawm leh hmuhnawm a tih theih mai awm e. House Leader leh Opposition member pakhat inchhanlawkna thleng zeuhah, Speaker address lova direct-a ‘i’ han intih bawl bawl ang kha hriat tur a awm leh zauh erawh mipui lam tan hmuh a nuam chiah lo a, chumi piah lamah, House chhung zahawmna te pawh a tibawrhbang deuh niin a ngaih theih a. Opposition member thenkhatin home minister an chuk rawn dan tawngkam pawh a dengkhawng deuh lo maw, a tih theih.
He session neih tur puan lawk a nih atanga mipui lamin an nghahhlelh pakhat, ‘CBI General Consent’ chungchangin rin ang he huin boruak a ti ‘hot’ tehchiam lo. A ni hnihnaa House Leader-ina Lokayukta amendment bill a putluh sawihonaah, opposition member-te zawhna a sawifiahna chu sawi buai zui awm lovin a reh zui a, chu chu General Consent chungchanga inhnialna thelhtu anga ngaih theih a ni.
Chief minister-in General Consent chungchang a sawi dan chu hei hi a ni: General consent a la ni reng a, amaherawhchu state employee a huap ta lo a ni. Chu chu a hmasa nen a danglamna a ni. Kei nin huap rawh se kan ti thei lo a, tu pawh lo sawrkar ila, kha bak kha kan pe thei lo. Central sawrkar Mizorama hnathawk ho erawh chu phalna min dil a ngai lo, an zalen, a general tak tak a ni. Amaherawhchu chu chuan state sawrkar hnuaia kan sawrkar hnathawkte an duh duha an rawn investigate theih erawh chu rem a ti ta lo a ni, dan hianin. Kan pe tel thei tawh lo, kha kha chu; that pawh a tha ang. Chuvang chuan a nih ang hian pawm ila, inhnialna tur a awm lova, amaherawh chu, kan investigating agency (Lokayukta/ACB) ten ‘CBI-ah pek ni rawh se’ tia an recommend hi chu keini hi chuan remtih zel kan tum; chu chu sawrkar hmasa nena kan danglamna tur a ni,” tiin.
Speaker-in session a kaihhruai dan pawh a hmuhnawmin a ngaihnawm tel; member-te han rik deuh laih laih kara inrawlh hun pawh a hre thawkhat; member-te khak nghal zung zung bik lova han inhrikthlak thawlna chance han inpek deuhte khan session a tingaihnawm zel tho a ni.
Thil mak tak pakhat erawh, sawrkar department pali atanga zawhna chhan loh 7 a awm leh, department pakhat (Land Revenue&Settlement)-in zawhna an dawn pathum an chhang lo vek kha chu, tun hnua thleng tawh lo atan a duhawm hle a ni.