Zofate leirem rahna tura thawkrim ber enlet ngen

Zofaten leirem kan rah theihna atan tute nge thawkrim ber a, tute nge hrehawm tuar nasa ber, tih hriaa history enlet turin Zoram mipui a ngen tih MNF adviser Lalringliana chuan a sawi.
Zirtawpnia MNF office-a inkhawmah AMC executive corporator ni bawk Lalringliana chuan, Zofaten leirem kan rah theihna turin tute nge thawkrim ber a, tute nge hrehawm tuar nasa ber, tih hriat tharna atan tura kan history enlet turin mipui a ngen tih a sawi. “Hnam hmangaihna rilru hi a ral thiang lo tih hre thar a, chu rilru chu kan put thar leh a tul. Thangthar rilru sang tak finna hman thiam a tul a. India sawrkar hnuaiah awm rih mah ila, Mizo hnam puanzar hnuaiah ngei Mizo hnam hla kan sak hun hi a thleng ngei ang,” a ti.
Remna vawngnung a, rinawm taka ram tana thawktu, ram lo hruai tawhtute an fakawm tih a sawi a. Remna leh muanna avanga kan rama hmasawnna tam tak thleng tawh leh thleng mek chu hmuh hmaih loin, hmalam pan zel a, hmasawnna nasa zawk thlen tirtu ni tura inbuatsaih a tul tih a sawi a ni.
MNF adviser hian AMC Ward No.VI by election tluang taka neih zawh a ni chu lawmawm a tih thu a sawi a. Vanduaithlak taka he ward corporator Pu John Zosangliana Ralte boral avanga by election neih a ngai chu pawi a tih thu sawiin, a hmunruak luah tura a nupui Pi Lalrinfeli, MNF & MPCC candidate intawm atana ruat ani chu thil tih awm tak a ni tih a sawi. Thawhhona tha tak hnuaiah inthlan tluang taka neih a ni tiin, Pi Lalrinfeli vote-tu zawng zawng chungah MNF chuan lawmthu a sawi tih a sawi a ni.