Syria-a hna thawk tura tirhluhte Sawrkar hmalaknain hruai haw

Dubai-a thawk tura anga tirhchhuah, a hnua Syria lama tirh tak daih Mizo hmeichhe pathum chu hrehawm taka hna thawhtir an ni tih Mizoram sawrkarin a hriat hnu ah hruai haw tumin hma a la a, kar kalta khan him takin Mizorama hruai thlen an ni.Kumin May thla khan Mizoram sawrkar chuan Syria-ah Mizo hmeichhe pathum, an hnathawhna atanga chhanchhuah ngai an awm thu leh lak chhuah tuma hma an lak mek thu an lo sawi tawh a. He thilah hian sawrkar laipui kaltlangin Mizoram sawrkar chuan Syria khawpui Damascus-a Embassy of India be pawpin, an ni hian an lo bawhzui a ni.
Thudawn danin, heng mite hi E&K Agency Vaivakawn-in ram pawna thawk tura a thawn an ni a. An hriat dan chuan,Dubai-a thawk tur an ni a, thla khatah cheng sing hnih vel hlawh tur anga sawi hmuh an ni. Dubai-ah hian thlenpui an ni ngei a, a lo buaipuitute hian hna an hmuhsak mai loa, a hnu ah hna hmuh sak nia insawiin, thlawhna an luh dawn tepah Syria-a kal tur an ni tih an inhre chauh a ni
Syria an thlen hi 2022 November 6 a ni a, in hrang hrangah housemaid hna an thawk a, chawlh an neih mang loh bakah ei leh in an dawng tha loa, hrehawm ti mah se, engemawchen an tuar phawt a, an theih tawh ngang loh hnu ah tanpuitu an zawng a, Mizoram sawrkar beng a thleng ta tih sawi a ni.
Indian Embassy-in hruai haw tuma hma an lak lai hian Syria-a anmahni ruaitute hian thubuaiah la in court hial an thleng a, court hian thiam a chantir avangin hruai haw theih an ni ta tih thu dawn a ni.
Sawrkar aiawh hian Mizoram Police CID Special Branch chu hma latu ber a ni a, hruai haw na atana sensi hi Mizoram sawrkarin a tum thung a. August 23 khan Mizoram thlenpui an ni tawh.
Hemi chungchangah hian ZPM Gen Hqrs. chuan thuchhuah siamin, Syria rama hnathawka awm Mizo hmeichhia pathumte sawrkar hmalakna avanga him dam taka hruai haw an ni chu lawmawm a tih thu a sawi a. Kumin June 11 khan chief minister Pu Lalduhoma kaihhruaiin ‘Mizo Diaspora Cell’ din a ni a, a thawh ber tur chu – Mizoram khua leh tui, state dang leh ram pawna chengte dinhmun ngaihven a, an harsatna emaw mamawh an neih emaw phuhru tura hma lak a ni tih a sawi a ni.
‘Ram pawna Mizo awm, harsatna tawkte ngaihtuahtu sawrkar kan nei hi a thlamuanthlak kan ti a. Mizo nulate laklet an nih theihna tura ngaihtuahna senga tha thawhtu chief minister, Home minister leh sawrkar official-te hmalakna chhuanawm kan ti a ni,’ a ti.