Lungleiah eiruk dona lama hriat tur tul an inhrilhfiah

Mizoram Lokayukta leh MJA Lunglei District buatsaihin Ningani khan Lungleiah ‘Anti-Corruption Awareness Campaign’ neih a ni.
Mizoram Lokayukta chairperson Lalmalsawma chuan Lungleia awareness programme buatsaih a nih theih nana MJA Lunglei District-in ruahmanna tha tak a siam avangin lawmthu a sawi a. India ramah hlemhlet leh eiruk dona atan Lok Pal chu hun rei tawh tak atangin hman a lo ni tawh a; state-ah chuan Lokayukta hman a ni thung tih a sawi. Mizoram Lokayukta chu member awm thei turte awm kim tawhin, thawktu lamah erawh duhthusamin a la famkim loa, zawi zawiin thuamchak mek zel a ni tih a sawi bawk.
Lokayukta member Joel Joseph Denga, MJS (Rtd) chuan ram hma lam hun atan corruption do chu a pawimawh hle a ni, tiin, dik taka tih leh dik taka nun chu Pathian duh dan a nih avangin ringtute tan chuan corruption do chu kan mawhphurhna a ni a tih a sawi.
Lunglei district bawrhsap R Lalthazuala pawhin Lungleia anti-corruption awareness campaign buatsaih a ni chu district tan thil lawmawm tak a ni tih a sawi a. Mizorama eiruk leh hlemhlet dona kawnga hma la tur Lokayukta-in a taka tha taka hna an thawk thei ta chu a lawmawm a tih thu a sawi bawk.
Awareness campaign buatsaihah hian sawrkar department hrang hrang thawktute, tlawmngai pawl aiawh leh zirlai pawl aiawhte telin, Mizoram Lokayukta-a assistant public prosecutor R Laltharliana chuan corruption awmzia leh ram tana nghawng tha lo a neih dan bakah a dona kawnga hma lak dan tur leh corruption do tura official, NGO leh khua leh tuite mawhphurhna a zirtir.
Mizoram Lokayukta dinhmun tlangpui a sawi a. Case 65 an neih tawh atangin case 44-ah preliminary enquiry tih tawh niin, mi pathum thiam loh chantir an ni tawh a ni.