Indians zingah Adani hausa ber

Hindenburg Research report avanga a hloh nei let leh tawhin Gautam Adani hausakna chu nikum khan 95% a pungin Rs 11.6 lakh crore nei anga chhut niin Mukesh Ambani khumin Indian zinga hausa ber a ni tia tarlan a ni.
Reliance Industries Chairman leh Managing Director Ambani hauhsakna chu nikum khan 25% a pung thungin Rs 10.14 lakh crore vel a ni tiin 2024 Hurun India Rich List chuan a tarlang a.
Kum 2023 report ah khan Adani hausakna chu 57% a tlahniamin Rs 4.74 lakh crore a dah a ni a, Ambani hausakna chu Rs 8.08 lakh crore anga chhutsak a ni.
Adani hausakna chu US-based short seller Hindenburg Research tena puhna hrang hrang an siam hnuah a tlahniam nasa hle a, mahse, chung puhna te chu Adani group te chuan an pha hul thak thung.
Kum 2014 edition ah khan Hurun te chuan Adani hausakna chu Rs 44,000 crore angin an chhutsak a, khatihlai khan Indian hausa zinga sawmna ni pha a ni a.
Shiv Nadar leh family of HCL te chuan pathumna hauhin an hausakna chu Rs 3.14 lakh crore a ni a Serum Institute of India neitu Cyrus Poonawala pawh pakhata tlahniamin palina niin a hausakna chu Rs 2.89 crore anga chhutsak a ni.
Sun Pharmaceuticals’ Dilip Shanghvi chuan hmalam pan zelin pangana niin nikumkhan parukna a nia a hausakna chu Rs 2.50 lakh crore anga chhutsak a ni bawk.
Radha Vembu of Zoho chu self-made women zinga hausa bera chhut niin Rs 47,500 crore nei anga chhutsak a ni a, Zepto co-founder Kaivalya Vohra leh Aadit Palicha te kum 20 chuang awrh te chu hausa zinga la naupang ber ni dunin Rs 3,600 crore leh Rs 4,300 crore nei anga chhutsak an ni bawk.
He list-ah hian Indians Rs 1,000 crore chin nei te chu tarlan niin kum 2024-ah Rs 1,000 crore nei pha mi 220 ah pungin 1,539 an awm tawh a. Heng mihausate hausakna belhkhawm hi kuminah 46% in a pung bawk.
Actor Shahrukh Khan chu he list ah hian a tumkhat nan langin a hausakna chu Rs 7,300 crore anga chhutsak niin chu chu a business partner entertainer zinga pahnihna hauh pha Juhi Chawla Rs 4,600 crore nei aiin a sang fe zawk a ni.
Hausa list-ah hian professional 16 te hming lang bawkin Arista Networks’ cheif executive Jayshree Ullal chu hausa berin Rs 32,100 crore nei anga chhut niin D-mart chief executive Ignatius Navil Noronha chuan dawtin Rs 6,900 crore nei anga chhutsak a ni bawk.
Kum 2024 a hausa chak ber erawh Gera Developments’ Kumar Pritamdas Gera niin a hausakna 566% in a pung a, quantum ang zawng chuan Ambani leh Adani te chu an sum neih peipung ber an ni thung.