MIZO TAWNG HMAN DAN DIK

M. Lalmanzuala

Mizo tawng hi a hman danah emaw, a ziak danah emaw, a dik ber hriat a har hle a. Tun thleng hian kan mithiamte zingah pawh hian a dik leh dik loh thu-ah ngaihdan inang thlap hi a la awm mang lo va. Hetiang lama thil hretu tura kan ngaih, Mizo Academy of Letters(MAL), Mizo Writers’ Association(MWA) leh Mizo Grammar Society (MGS) te pawh hian inlungrualna an neih hriat a la ni rih lo a ni.
Mizo tawng hman dan dik, ziak dan dik leh tihhmasawn leh humhalh tul tihna a lo lian ta viau va. Kum 2021 atang khan kan mithiam rualten sawihona te an nei thin a. Mizo tawng tihhmasawn leh humhalhna kawnga hma la turin Mizoram Legislative Assembly chuan Mizo Language Development Board (MLDB) dinna dan February 2, 2023 khan a pass ta a ni. |hutkhawm hmasaber chu November 17, 2023 khan an Chairman, Pu R. Lallianzuala hovin Directorate of School Education Committee Room, Treasury Square, Aizawlah neih a ni.
Nimin August 29, 2024 khan MLDB hruaitute leh YMA hruaitute chuan YMA chanchinbu enkawltute tan Mizo tawng hman dan zirpuina hun an hmang a. Zirhona pawh an neizui a ni. Hetiang hunah te hi chuan Radio, TV announcer te hi sawm tel ve se ka lo ti ve hnuhnawh a. Aizawla chanchinbu editor te pawh.
A pawimawhna hria a, tun hma kum thum atang tawha sawihona te neih a, chuta tana dan pawh tun hma kum khat leh a chanve zeta pass a ni tawh a, thutkhawmna hmasa ber thla kaw(9) hnu-a han neih chauh kha chuan an hnathawh zel dan turah beiseina neih san a har hle a. Zirhona nei tura thla kua(9) zet an han nghak leh hian beisei a tisang lo lehzual a ni.
Mizo tawng ziak dan dik, hman dan dik chungchangah hian thuchhuah an la nei rih lo niin a lang a, a mak viau a ni. MAL hruaitute pawh hian a chang changa TV te-a sawihona an neih thin bak hi chu ziaka thuchhuah an la nei rih lo niin a lang a. Kan tawng tihhmasawn leh humhalhna kawng hi a la tawiin a la zim rih hle a ni.
TV-a thusawi te hian tangkaina an nei lo chu kan ti lo va. Mahse, tawng hmasawnna leh humhalhna lamah chuan a rah tha hmuh leh hriat tur a awm rih lo tluk a ni.
Mimal chanchin han sawikai ta daih ila. Diklo ngaithei lo tawp mai mi ka ni a. Chu chu ka zia-ah hian a bet tlat a. TV screen-a ziak diklo a awm chuan magnet-in a rawn pawt emaw tih mai tur hian ka mit hian a han hmu nghal a. Lam rik diklo a awm pawhin ka bengah hian a rawn ri hrang thlap thin a ni. Chutiang mi tan chuan diklo hmuh leh hriat chu ngawihbopui theih a ni lo.
Tlangval lai atanga radio ngaithla thin, TV pawh kan ban phaka a rawn awm atanga ni tin ena ngaithla thin ka ni a. Kan Radio, TV ten belhchian dawlna lama BBC, VOA, CNN te an tluk lohzia hi ka hmu-in ka hria a. Hma kan lo sawn ve nan tiin, an fel tawk lohna-ah te chuan AIR, DDK, Cable TV hotute lehkha ka thawn thin a. Ka rawtna te chu an ngaih pawimawh lohva, engmah tihdanglam, siamthat hna thawh an tum si lohvah chuan Announcer-te mobile number lain Open Letter te ka thawn ta thung a. An tawng hman dik loh, i lo ngaithla ang u, tih aia i lo ngaithla ang, an tih thin phei chu, i lo ngaithla ang u, tiin an rawn sawi ta deuh vek a, a lawmawm ka ti hle a ni. Anmahni zawkin lawmthu min han hrilh phei chu lawmawm ka ti lehzual a ni.
Kan Legislator-te ngeiin Assembly House-a tawngkam chuangtlai leh awmze nei lo, KA SAWI DUH A, an tih chhen thin pawh ka sawi chhuak thin a. Anni chuan an tihdan hi dik an ti a ni ang, an tih pangngaiin an ti zel a, an uar tawlh tawlh zawk a ni. Speaker pawhin, I LO SAWM ANG, a tih chu a sim duh miah lo.
Kan sawi tak ang hian Radio, TV, Vantlang inkhawmna, Assembly House leh Pulpit tlang thlengin Mizo tawng hman diklohna hi a tam em em a. Kan MLDB, MAL, MWA, MGS te hian hengte hi sawisel emaw, sawi chhuah emaw an neih kan hre ngai lo va, a mak viau a ni.
A pawi ber mai chu, Legislator-te thusawi te, Public Media-a thusawi te hi chu mi tam takin entawntlaka ngaia an lo lakchhawn thin avanga tawng hman dik loh hi lo punlun ta thin hi a ni.
Pu C. Rokhuma khan a serthlum ei chhe thintu thlangdar tihhlum nan, Mixture a siam a. Chu chuan a kaphlum thin a. Chu chu, “Direct Hit Method” a ti a; a tangkai ber a ni. Ralkhat atanga hnawh rem theih an ni lo. Kan MLDB hotute pawh hian TV-a sawihona neih hi chuan rah tha a thlen tak tak thei lo tih hria se; Direct Hit Method te hi hmang ve thin tawh zawk se, kan thatpui zawk ngei ang.
Kan kohhranten Pathian biak dan min neihpui langsar ber chu biak ina inkhawm hi a ni a. Fakna hla tha tak tak te kan sa a; Pathian thu tha tak tak te kan sawi a; kan nunpui si loh avangin Kristian tha-a ngaih tlak chu kan awm mang si lo ang hian, Mizo tawng tihhmasawna humhalh dan pawh hi a sawia sawi mai chu a tawk lo tih kan hriat tlan a tul a ni.
Pu T. Zorampela kha Mizo tawng hman dan dik leh ziak dan dik thu-a rawn tlak tak ni-a hria-a ka biakrawn ber thin a ni a. A lehkhabu ziak, KA NUN LAMTLUANG leh MIZO |AWNG ZIRHONA kha ka chhuah(publish)-sak a. Mizo tawng zirhona, hman dan dik, ziak dan dik bik chu phek 108 a ni. Tun kum li(4) chhung hian he lehkhabu rawn ngaihven, kan mithiamte zingah hian an awm miah lo va, mak ka ti hle thin.
MAL, MWA, MGS, MLDB member ni ve lo mah ila, ram ka veia ka theih ang anga thusawi leh thuziaka ka inhmang ang hian, Mizo tawng hman dan leh ziak dan dik chungchangah pawh hian ka theih ang anga ka inhman ve thu ka han sawi a ni e.