Minister-te in cheina atan nuai 110 hman a ni tawh – PC party

Mizoram sawrkar chuan minister leh minister tlukpui mimal in cheina atana mipui sum cheng nuai 110 a hmang leh tawh niin PC party chuan an sawi.
PC thuchhuak chuan, RTI hmanga an hriat danin, minister leh minister tlukpui leh VIP thenkhat bangla leh quarters-ah chengin an chenna hi sum tam taka chei a nih avangin sawisel a hlawh a. Bangla/ quarters pawha cheng lo – cabinet minister K Sapdanga (nuai 12), Vanlalhlana (nuai 12), Lalthansanga (nuai 12), Vanlalthlana (nuai 12) leh PC Vanlalruata (nuai 12); minister of state F Rodingliana (nuai 10), B Lalchhanzova (nuai 10), Prof. Lalnilawma (nuai 10) leh Lalnghinglova Hmar (nuai 10) leh, adviser to CM H Ginzalala (nuai 10) te in chei nan belhkhawma cheng nuai 110 hman a ni chu ram sum dinhmun atanga thlirin awm ang lo an ti hle tih a sawi.
‘Mizoram sawrkarin hun rei tak sum harsatna a tawk tawh a. Sawrkar hnathawk hlawh a hunah a pe kim thei lo reng a, kan kawngpuiin a chhiat phah a, mipuiin a hun taka electric bill kan pe chung pawhin sawrkarin electric bill cheng vaibelchhe tel kan bat reng phah a. Hetiang sum harsatna lak atanga kan chhuah theihnan hian sawrkarin inrenchem a ngaih thu sawi rengin, mipuiin sum renchem zawnga sawrkar hmalakna kan thlawp a. Sum hmuh belh tura mipui phur tirit zawnga sawrkar hmalakna pawh mipuiin kan dodal phal lo a ni a. Hetiang a nih lai a, minister leh minister tlukpuite in cheina atana mipui sum nuai 110 lai hman a ni hi zialo kan ti hle a ni,’ a ti.