Sanctuary atanga chhuak Sai himna atan ngen sak

Lawngtlai district-a Ngengpui Wildlife Sanctuary atanga sai chhuak ti na lo tur leh chhawnchhaih lo turin EF&CC hnuaia Wildlife Division hotute chuan an ngen.
Chhimtuipui Wildlife Division deputy conservator of forest-in thuchhuah a siamah Ngengpui Wildlife Sanctuary-a cheng ram sai (wild elephant) chu sanctuary chhevel khaw hnaihah a chhuak tih hriat a ni a. He sai hi tun dinhmunah Mampui leh Khawmawi khaw chhehvelah a che tla mek a, Lawngtlai atanga South Bungtlang inkara khaw awmte, a bikin khualzin leh loneimite fimkhur tur leh chhawnchhaih /ti na lo turin a hriattir.
‘Sai hi kan hmu emaw a awmna chin kan hria emaw a nih chuan mahni khua theuha wildlife guard-te a ranglama hriattir zel turin kan inngen a ni,’ a ti.
Sai hi ‘The Wildlife Protection Act 1972’ in Schedule-I hnuaiah dahin, chhawnchhaih, tawktarh, tura hrai, tih nat emaw tih hlum a khap tih a sawi a. He dan hi bawhchhiat a nih chuan, sumfai Rs. 25000 aia tlem lo leh a lo berah kum 3 atanga kum 7 thleng lung in tan theih a ni tih a sawi bawk.
Ngengpui Wildlife Sanctuary chhehvela khaw awmte he sai lakah hian ngilneihna lantir tur leh an an dawhtheihna leh thawhpuina an ngen tih DCF hian a sawi a ni.