International Literacy Day hmang
Khawvel puma ziak leh chhiar thiam a pawimawh zia inzirtir thar lehna Ni – International Literacy Day chu Thawhtanni khan hman a ni a. Mizoramah chuan Aizawl bakah district dangah pawh hman a ni.
International Literacy Day hi September 8 a ni a. Kuminah Pathiannia a tlak avangin Thawhtanni khan hman a ni. Aizawlah chuan MLA T Lalhlimpuia’n hmanpuiin, literacy pawimawhna a lian zel a, lehkha ziak leh chhiar chauh ni loin computer application hrang hrang hrethiam leh hmang thei nih a pawimawh chho zel tih a sawi. Adult Education-in skill training chi hrang hrang a buaipui chu a tangkai tih sawiin, “Ziak leh chhiar hnufumna hmun hi hmun hla leh kirkhawr a ni deuh zel a; heng hmunah hian kohhran missionary-te an awm thin a, kan missionary-te hmang tangkai zawnga hma lak pawh a tul hle,” a ti.
A Aw B kan neih atanga kum 100 chhungin Mizoram chu India ram state zinga literacy lama a sang ber dawttu kan ni thei tih MLA hian sawiin, ziak leh chhiar thiamna lama hma kan sawnna hi Mizo mipui, tlawmngai pawl, zirtirtu, kohhran leh sawrkar thawhhona zar a ni tih a sawi a ni.
“Mizoram hi sawrkar kum 2023- 2024 chhunga zaah za ziak leh chhiar thiam ni thei tura sawrkar laipui Ministry of Education-in a beisei zingah kan tel a, hemi tihlawhtling tur hian state sawrkar chuan hma a la mek a, Mizoram pum huap survey pawh neih a ni tawh a ni,” T Lalhlimpuia hian a ti.
1966 October 26-a UNESCO General Conference chuan September 8 hi International Literacy Day atan a puang a, khawvel hmun hrang hrangah he ni hi kumtin hman thin a ni. A tum ber chu, ziak leh chhiar thiam pawimawh zia leh tul zia inhrilh a ni. Mizoramah chuan kum 1976 atanga hman ta a ni a. Kum 2018-a chhut dan chuan, Mizorama ziak leh chhiar thiam awm zat hi zaa 96 kan ni a, zaa za nih theih nan kawng hrang hrang hma lak chhoh zel a ni.
Kumin International Literacy Day thupui chu “Promoting Multilingual Education: Literacy for Mutual Understanding and Peace” tih a ni a. Ziak leh chhiar thiam lo, naupang leh puitling pawh anmahni pianpui tawng ngeia thiamna pek chu a tum lam a ni.