Bungraw man tlawm taka hralhah fimkhur turin ngen

Social media kaltlanga home appliances bungrua brand hrang hrang Sony, LG, Samsung, Godrej, Haier, Panasonic, Lloyd, Whirlpool, IFB adt tlawm taka hralh thei anga inzuar mekte chu company hriatpuina a ni lo tih mipuiin hriatsak se an duh tih Mizoram Home Appliances Distributors Association chuan an sawi.
Thuchhuah an siamah company-te hian an brand image leh reputation an ngaipawimawh em em a, an kutchhuak hi a tha tawk a ni tih leh a rintlak a ni tih mipui hriattir an tum hle a. Hemi atan hian fimkhur takin, hun tam tak leh sum leh pai tam tak sengin hma an la hmasa thin a. Distribution leh retail channel-a hralh chhuah tlaka an ngaih loh chu, vendor hrang hrangah tlawm te te in an hralh a. Heng secondhand zuarte hian a remchan ang anga a part rem khawmin mipui hnena zuar kual leh an nih avangin company leh authorised service centre-ten warranty leh after sale service-ah mawh an phur duh lo tih an sawi.
Company zawng zawngin retail-a hralh chhuahna tur a man (retail price) hi India ram pumah a bituk vek a, heng man zat hi dealer tinah en theih vek a ni tih an sawi bawk.