Damlai thlá

JC.Zoremi Hmar Joute

Ka duh aia ka tlai tawh avangin hmanhmawh zetin in lam panin ka kal hlawk hlawk a, Mount Carmel school pan chhohna kawng bula awm ka thiannu Masawmi te in zawn ka thlen chuan an kawt hungna pal awng karah chuan bihin ka’n au a. A lo tlan chhuak vat a, ruah a tlak siar siar avang chuan nihliap ka khum bawk a. Kan ri luam a, lut lawk mai tura min tih tlat avang chuan ka lut ta nge nge a. An varandah-ah chuan pa upa tawh lam hian an puanthui khawl chhia a lo siam sak mek bawk a, thingpui in te a sawi luam na a, ka hmanhmawh tawh em avang chuan thingpui in lo chuan ka chhuahsan leh ta mai a.
An in ka kal pel chauh tih-ah ka phone a lo ri a, Msawmi te kawmthlang lawka dawr siam, Pi Muani a lo ni a. Ka thil zawrh a batna pawisa chu a neih tawh thu leh ka haw paha lam mai tura min duh thu a rawn sawi a, pawisa mamawh a nat bakah a hla tawh chuang lo va tiin ngawi rengin ka let thla leh a, Masawmi leh khawl siam chuan ka let leh lam chu min hmu lo.
Pawisa ka zu lam zo, ka haw chho leh lam chu ka zia a chhuak ta tlat pek a, ka tlai tawh tih ka hre tho na a, keimaha chimawmna thlarau sual chu ka hneh ngang lo. A hma-a ka tih ang chiah khan, an kawt hungna pal karah bawk chuan bihin ka’n au leh a, a rawn tlan chhuak chu a meng phawk nasa ngang mai; kan inbiak dan chu hetiang deuh hi a ni.
“Masawm…Masawm”
“Awi…Zovi!”
“In dam tlang em? Inhmuh a va khat ve!”
“Ka awih thei lo…a ni thei lo”
“Eng chu maw? Eng nge?”
“Nichin mai khan tiang chiah khan min rawn au a, i thil sawi pawh a inang chiah!”
“Awihawm loh…ka lo haw chiah alawm, inhmuh a khat em a ka tia”
“A ni lo Zo, i kawr hak te, i nihliap vawn dan te, i rawn dahna awng pawh kha kha chiah kha alawm, i thil sawi pawh a inang chiah chiah!”
“Ka va awih lo e aw! Tunah hian ka lo haw chiah alawm..” (Masawmi chu a meng kuau ringawt a, a hlauhthawn hmel takzet tawh , engah mah ngai lo niawm tak chuan ka biak chhunzawm zel a)
“Sahbawn kha an discount tha tawp a, engzat nge i duh ve dawn?”
“Awiiii…kha pawh kha i sawi! Paruk tal chu ka duh ve ka tih nghe nghe kha; awi a mak em mai…eng nge thil awmzia hiiii! Ngawi teh, lo lut leh phawt mai teh; a mak ka ti em mai, ka awih thei lo!”
“A eng chu nge maw mak i tih vak vak le!”
“Zo, nichin mai khan tuna thil thleng ang chiah hi a thleng vek alawm, min rawn au a, tuna mi ang chiah kha a ni vek mai; lengah ka sawm bawk che a, i lo lut ngei alawm!”
(A hmaa ka dahna-ah chiah ka nihliap chu ka dah leh kher a, a hma-a ka sawi ang chiah, ‘a va vawt teuh ve’ tih chu ka sawi leh kher bawk a. Mak a tih hmel pawh a ni tawh lo, a hlauh hmel mah mah tawh.)
“Awii…kha pawh kha nichin chuan i sawi! I nihliap pawh kha i dahna ngaiah chiah i dah leh! Awi a mak ka ti em mai kei chuuu” (A tap lo chauh tawh.)
“Tak tak ana Masawm…tumah hrilh lo la…dam lai thla ka nei alawm”
(Min hlat dawrh pahin)” Awiii…ka raap lutuk!”
“Hrehawm ka ti ve lutuk a, miin an hria ang tih ka hlau thei lutuk. Mahse ka duha ka control theih a ni si lo va, keimah ai mah hian a bengvarin a polite zawk lehnghal a; a buaithlak thin khawp mai.” (Ka kun vei nguih a. Masawmi chu a tawng lo. A ka a hup a, a meng kuau ringawt a!)
“Chuan…midang i hrilh emaw, i sawi pun chuan i kai ve thei a nia aw. Kei pawh hi ka sawi chhuah avanga kai ka nia, tihreh leh dan ka thiam tawh si lo va, a hrehawm tak tak a ni. Tumah hrilh lo la ka duh takzet; dam lai thla neih hi thil nuam a ni miah lo a nia, i kai ve palh hlauh ang e aw…”
“Aih, ka duh lo. Ka sawi lovang, ka sawi duh lo; ka sawi dawn lo. Ka duh lo”
“Ka zu haw ang e, ka tlai ta hle mai. Nidangah pawh ka thla zawk hian a rawn tlawh fo mai thei cheu a, lo hlau lo la, tha deuhin i lo be zel dawn nia. A chang chuan kei ai hian a fel zawk a nia…”
“Aih ka duh lo Zo, tlawh fo ka duh lo…Awi engtia tih chi ngeee?”
“Engtia tih chi mah a ni lo, keimah leh ka thla i hre hrang dawn chuang hleinem!”
An varandah-a puanthui khawl siam mek putar chu a rawn tho tuih tuih a, “Hei leh chen hi Pathian zarah ka dam ve ta; heti ang em ema chiang hian dam lai thla ka la hmu lo!” a rawn ti ve ta a. An in ka kal pel chauh tih chuan ka nuih za lutuk ka insumna chu ka dul a na vek tawh! Nu cher leh dawldang ber mai, tihthaih loh pawha dam ve tâwk tâwk a nih nak alaia ka’n tithlabar chiam mai chu ka inthiam lo lek lek a, ka nghal lutuk chu ka inhaw lek lek mai. A hnu zelah pawh han inhmuh hian a ti deuh ta duk mai a, min khawih kher loh chuan min be tha duh ta mang lo va, ka tihder tih lah ka hrilh mai phal bik der si lo va, vawi khat tal tihder leh atan ka hual rauh rauh na a, tun thleng hian ka ti leh ta lo. An thenawm ten ka tihder a ni tih an hrilh chiam paw’n a awih duh chuang hlei lo va!