Ruihhlo do – demand reduction

Tun hnaia Darlawna ruihhlo do chungchanga hmalak zel dan tur sawi hova inrawnkhawmna neihna a hmanpuinaah excise & narcotics minister chuan ruihhlo do kawngah kohhrante chu nasa lehzuala hma la turin a ngen a. Hei bakah hian zirna in, school leh college-ahte ruihhlo ti lo tura inzirtirna nasa zawk kalpui a tul thu sawiin, zirtirtute pawh tan la thar leh turin a ngen a.
Ruihhlo hian min chim hneh ta hle. Tunhma kum 10 hma lama kum khat chhunga heroin manchhuah zat chu tun laia ni khat chhunga man chhuah zat nen a intluk ta deuh ta reng mai. Kumin chhung (August ni 31 thleng)a ruihhlo man zat chu Kg 33.855 a tling leh der tawh. Chawhrualin thla khatah heroin Kg 4.23 zel man ang a ni. Man chhuah loh hi a let tam tak a awm a rinawm.
Ruihhlo do beihpui thlak a tulzia chu tuna ruihhlovin min run mek dan atang hian a lang chiang tawh hle a, sawrkar emaw YMA emaw papek mai chi a ni tawh lova, mahni theihna zawn theuhah hma kan lak suau suau hi a tul takzet tawh a ni.
A pawimawh hmasa chu naupang thanglian mekte hi an ni. An tet te atanga ruihhlo huattir tur zawnga an thluak kan suk hi a tul a ni tawh ber a, chu chu chhungkua atanga bul tan a, zirna in lama chhunzawm a, khawtlangin back up a, kohhranin Pathian thu nena lo plaster hnan a pawimawh dawn a ni.
A sawt ber tur chu inthlahdah bik awm lova mar pata group hrang hrangten hmalakna inpha man zata beihpui thlak char char hi a ni a. Chhungkua leh zirna in an tan dun that viau chuan thil dangah chuan hah lutuk lovin a chhunzawm theih a rinawm. Ruihhlo demand-tu tur, naupang thanglaite hi kan lo hup hneh theih chuan tuna addiction awm mek hi chu zawi zawiin a kiam chho ang a, supply reduction lama na taka hmalakna nen a kal kawp theih chuan a kum telin tlakhniam lam kan pan hret hret theih hi a beisei theih awm e.
Ruihhlo tukzal tur chuan peng hrang hrangte kan tanrual that a pawimawh ber a, demand reduction lam hi nawr nat hle a pawimawh dawn a ni.