Lungleiah SHG Cultural Fest

India ram puma chawlhkar hnih chhung awh tur faina beihpui thlak, Swachhata Hi Seva 2024 kalpui mekah nimin khan Urban Development & Poverty Alleviation Department Lunglei huaihawtin Lungleiah self help group (SHG) thil siam pho chhuah a ni.
Lunglei addl DC James Miahlung chuan a hmanpui a, SHG-ten cultural fest-a an thil siam an pho chhuak thei chu lawmawm a tih thu a sawi a. SHG chu eizawnna mumal neilote eizawnna siamsaktu leh miretheite khai chhuahna atana sawrkarin a ruahman a nih angin, Lunglei district-a SHG 1200 chuang awmten tih tak taka hma an lak chuan khua leh tui tam takin din chhuah nan an hmang thei dawn tih a sawi a ni.
He hunah hian PHED, DLAO, DIPRO, UD&PA-a thawktute leh self help group member-te an tel a; stall 18 awmin, UD&PA hnuaia SHG 15 leh mimal 3 ten an thil siam chhuah leh thlai thar chi hrang hrang chu mipuiin an en tur leh an lei theih turin an pho chhuak a. Thil pho chhuah leh hralh bakah hian, mipui hnena faina leh thianghlimna kawng inzirtir a ni.