Bukna dik lo leh a behbawm…
Kar kalta Inrinni khan Champhai bazarpuia sa leh thlai thar zuarte bukna leh tehna hrang hrang hmante DCSO hovin Legal Metrology Department, Sub Hqtrs YMA, MHIP leh Champhai Consumer hotu ten an endik a, Non- Standard Spring Balance 9 leh Beam Scale (2kgs) 1 man a ni a. DCSO chuan consumer ten an chanvo dik tak an chan ngei theih nan lungawi lohna neite chuan District Consumers Dispute Redressal Commision hmang tangkai turin a ngen a ni.
Tunhma atang tawhin district hrang hrangah thuneituten bukna dik lo hman a nih leh nih loh hi an lo endik tawh thin a, bukna diklo hmangtu man chhuah hi an awm deuh zel a ni. Thuneitu lam hian sumdawngte hman tur bukna hi, customer-tena an hmuh theihna tur a langsar lai takah, sawrkar chhinchhiahna seal puttir vek se, chu chuan awmzia a nei deuhin a rinawm a. Sawrkar chhinchhiahna lo tihmelhem lehzelte chu an chungah na taka action lak ni ta se, chu chuan min siam tha deuh mai lo maw, tih ngaihdan a awm thei awm e.
Tun hnai, kawngpui a chhiat avanga Mizofed filling station-a petrol lak tur a awm loh laiin, a bul lawk pen sawm vel leka hlaah black-a lei tur petrol a intlar tuarh a. Helai hmun hi sawrkar thuneituten black-a petrol zawrh khapna hmun a nih thu an lo chhuah tawh a, mahse khapna thupek kenkawh that a nih leh si loh avangin blacker-te hi a hnu lawkah an huangtau leh mai a, chutiang vel chu kan ni. Helaiah hian kum nga vel kaltaah khan, black-a petrol zawrhna dawrte pakhat a kang hluah tawh a, vanneihthlak takin filling station a kang kai lo hlauh! Chuti chung chuan tun thlengin black-a petrol zawrhna hmunpui ber a la ni thei a nih chu! Sawrkar inenfiah leh hle teh se.
Tunhnaia social media-a lar tak pakhat chu, litre hnih vel dawng plastic bottle-a petrol dah, a pawna petrol man Rs 700/- tih chuanna thlalak chu a ni. A mipui zah loh thlak hle, hetiang hi thleng zui tawh lo tura thuneituten hma an lak a tha khawp ang.
Bukna dik lo hi kan Pathian pawhin a duh lo hle tih Bible-ah hmuh tur a tam a. Thufingte bung 11-ah chuan ‘Bûkna dik lo hi Lalpa mit hmuhin thil tenawm…’ tih a chuang a. Lalpa mithmuha ‘tenawm’ hi sumdawng hlemhlete hian an customer-te hi lo hlui thin tihna a ni.