Palian champion thar Daniel Dubois

Pathianni zing khan Wembley Stadium, London in inhnek lian tak a thleng a, IBF heavyweight kawnghren inchuhnaah Daniel Dubois chuan Anthony Joshua chu knock out in an hneh a, champion thar a ni. Dubois lakah a mualpho vangin Anthony Joshua hma lam hun tur a chiang lo hle.
England a khelmual ropui ber Wembley Stadium a mipui 96,000 zet pungkhawm hmaah kum naupang zawk leh rinkai lo zawk Daniel Dubois-a’n bul a tan tha viau a, round khatnaah palian champion hlui Anthony Joshua a hnek tlu ngal. Tawnhriat ngah zawk Joshua hian a khingpui a huphurh lo tih hriat takin a inveng fimkhur tawk lo. A in veng fimkhur lo hi a tuar a, round khatna tawp dawn tepah Dubois kut thlak na tak dawl lovin a tlu. Thochhuak leh thuai mah se a lu a hai tih a hriat hle. Na zawka Dubois-an a hneh nawn leh hmain dar a ri hlauh. He dar ri hi Joshua tan vanneihna niin, tlawm a pumpelh phawt.
Round hnihnaah Joshua a khel tha hret a, talbuai viau mah se tlu em lovin round a hmang tluan thei hram. Round nga an inhnek chhungin round hnihnaah chiah Joshua hi a tlu lova, round dang zawngah a khingpuiin a hnek tlu vek. Ngam taka a khingpui nawrtu Dubois hian round thumnaah a khel tha zui leh viau a, a khingpui a hnek tlu nawn leh. Round thumnaah pawh hian dar riin Joshua a chhan leh hlauh a, vanneihthlak ang reng takin tlawm a pumpelh nawn leh.
Insiamthat mamawh viau mah se Joshua a insiamtha thei lova, round linaah a talbuai zui leh viau, Round linaa tir lamah a tluk hnuin Joshua hi a tlu nawn leh a, referee in inhnek a titawp a ngaih a ni hman hial. Referee hian Marcus McDonnell hian inhnek titawp lovin Joshua hi ‘i tlu love’ a tihna zawk a lo ni a, inhnek a la tawp lo. Round nganaah Joshua-a’n hma a sawn hret a, bul a tan thatna round hi a tlawm chianna a ni ta thung. Palian huangah vawi hnih lo champion tawh Joshua hian round nganaah fuh zetin a khingpui a hnek fuh a, knock out ngei tumin a nawr chhunzawm nghal. A khingpui hnek tluk a tum luat tukah a fimkhurna a hloh. In veng lo taka a nawr laiin Dubios hian chiang zetin a khabe kualah tak a lo hnek fuh siah a, inhnek zui tura thochhuak tur reng awm lovin Joshua hi a tlu zui ta a. IFB kawnghren lo hreng lawktu Daniel Dubois chuan knock out in hnehna a chang a, palian champion thar a ni ta a ni.
Daniel Dubois lakah a mualpho vangin Anthony Joshua hma lam hun a chiang lova, Dubois nen inhnek nawn leh theihna an neih pawh an hmang ngei dawn em tih a chiang lo. Dubois hnehin, palian champion thar ni leh se Joshua hian Oleksandr Usyk leh Tyson Futy te inhneka chak zawk zawk hmachhawnin, WBO, WBC leh IBA kawnghren a chuh zui leh thei tura ngaih a ni a. Inhnek lian hmachhawn nawn leh beiseina a neih pawh sarah a zam ral ta bawk.
IBF champion thar Daniel Dubois hian Usyk kalsan kawnghren a hreng tan dawn a. Kum 27 chauha upa a nih vangin inhnek vawi 24 hmachhawn tawha vawi hnih tlawm zawkah tang tawh Deniel Dubois hian palian huanga kawnghren dang lak belh theihna hun tha tak a nei zui tura ngaih a ni. Palian huangah vawi hnih champion tawh Anthony Joshua meuh pawh kha ti khawpa a sawp thei a nih chuan Dubois tan hian palian huangah huphurhawm an awm tam lo tura ngaih a ni a, hmabak eng tak a nei.