FPO-te dinhmun zirchiangtu tir turin central minister ngen

BJP Mizoram hruaitute chuan Union minister of state for Agriculture and Farmers’ Welfare Bhagirath Choudhary hnenah Mizorama farmers producer organization (FPO) te dinhmun zirchiangtu turte rawn tir a, Mizoramin Agriculture ministry atanga kan sum dawn a nihna anga hman a ni em tih endiktu team tir turin an ngen.
New Delhi-a cham mek BJP State general secretary Lalthangmawii leh MLA K Hramo te hian Union minister of state for Agriculture and Farmers’ Welfare hi hmu in, Mizoram kuthnathawktu/ loneituten hma an sawn theih dan tur leh hamthatna an dawn theih dan tur an sawipui a. Mizorama minister a lo zin tuma BJP Mizoram-in a hnena thu an thlen chu bawhzui niin, FPO kaltlanga Mizoram kuthnathawktute dinhmun chawikan, loneituten an thlai thar state pawn lama man man zawka an hralh theih dan tur, Mizoram Phura hmuna leilet tih changtlunna tur, awlsam zawka kuthnathawktuten PM Kisan an dawn theih dan tur, an lo leh huan tih changthlunna atana KCC loan awlsam zawka an puk theih dan turte an sawipui.
Union MoS hian BJP Mizoram hruaitute thu thlen chu a chhinchhiah thu leh loneituten an chhawr theih ngei tura hma a lak pui zel tur thu sawiin, state sawrkar hotute pawh a tul anga sawipui a tum thu a lo hrilh a ni.