Aizawlah parliamentarian/legislator rualin ram tana tangkai tur sawiho

Commonwealth Parliamentary Association (CPA) India Region Zone-III chuan Zirtawpni atang khan Aizawlah annual conference vawi 21-na an hmang a. CPA India Regional chairman, Lok Sabha speaker Om Birla leh Rajya Sabha deputy chairman Harivash Narayan Singh ten an telpui.Thuthar thehdarhtute a kawmnaah Om Birla chuan, State Assembly thutkhawm zat tura duan zat tur awmsa chu state tinin an ngaihpawimawh a ngai tih a sawi a. State tina legislator-te pawhin tunlai thiamna chu hmundang nen inpawh taka awm theih nan hmang tangkai turin a duh tih a sawi a ni.
CPA thutkhawmah langtlang zawka state assembly-te hmalakna mipui hnena a thlen theih dan tur sawi a ni dawn a. House tih dan phung leh kalhmanga mitinin an hriat theih nan hma lak a ni dawn tih a sawi bawk.
CPA khawmpuiah India Regional chairman chuan hmarchhak bialin hmasawnna rahbi thar a rap chho mek chu lawmawm a tih thu a sawi a. state zawng zawng rel kawngin a thlunzawm vek a tul, tiin, India rama investment ti duh an tam a, hmarchhak bialah tourism, agriculture, art & culture lamah investment nasa zawk kalpui theih niin a ngai tih a sawi. “Kan inkalpawhna kawng hi tha lehzual se, chu’ng hmalakna chu chak zawkin kan kalpui thei ngei ang,” a ti.
Rajya Sabha deputy chairman chuan CPA chu kum 100 aia upa tawh association tangkai, dan siamtuten an tawn hriat an inhrilhtawnna leh ram bial (region) chhunga an mamawh intawm thil pawimawh an sawihona hmun a ni, tiin, CPA Region Zone III huamchhung state-te India ram tana a pawimawhna leh ram economy tana tha an thawh hlawk zia a tilang tih a sawi.
Mizoram chief minister Lalduhoma chuan CPA member kalkhawm chuan kan ram chu mipui rorelna ram, mitin huapzo leh dan lalna ram a nih zia hriatnawn tir a, nghet taka tungding zel turin legislative zahawmna vawnghim turin a sawm.
“Ram dan hi dan siamtuten rilru thianghlim, langtlang leh mipui thatna tura an siam a ni tih kan hriat phawt chuan tha taka zawm turin mipui an npeih thin a. Commonwealth Parliamentary Association hian kan tawnhriat inhrilh kawngah kan inzir zelna atan leh ngaihdan kan inhrilhtawnna kawngah min tanpui nasa a. Tun conference pawh hi kan rama legislative ruhrel tichak zualtu leh inpawhna thuk zawk neih nan hmang ang u,” a ti.
CPA Region Zone-III chairman, Nagaland Legislative Assembly speaker Sharingain Longkumer chuan inkhawmpui an neih chhan leh a thil tum a sawi a ni.
“India – ASEAN hmathlir sumdawnna leh thawhhonaa hmarchhak ram te telh dan” tih thupui chu sawiho zui a ni.
CPA India Region bik hian India rama state/UT legislature 31 a thlungkhawm a. India Region hi Zone 4-a then niin, Region Zone-III hian Assam, Arunachal Pradesh, Manipur, Meghalaya, Mizoram, Nagaland, Sikkim, Tripura a huam a ni.