Sialsuk hnenah Best Tourism Village

Sawrkar laipui Ministry of Tourism-in World Tourism Day denchhena a buatsaih ‘Best Tourism Village Competition 2024’ ah Sialsuk khua chuan category 5 zinga pakhat “Community Based Tourism” ah lawmman a la a, Zirtawpnia World Tourism Day lawmna New Delhi-a neihah Vice Presisent of India Jagdeep Dhankhar leh Union minister for Tourism & Culture Gajendra Singh Shekhawat chuan Aizawl South-III bialtu MLA Baryl Vanneihsangi Tlau leh Mizoram Tourism secretary Dr Lalrozama ten Sialsuk aiawhin an dawng.
He intihsiaknaah hian state 30 atangin khaw 991 an inlan a, chu’ng khaw 991 chu category hrang hrang 8-ah thliar leh niin, chuta tang chuan khaw 36 chu lawmman la tura thlan an ni.
Sialsukah hian micheng 2370 awmin, chhungkaw 27-in tourism kaihhnawihin ei an zawng a. Tourism atanga sum lut zaa 10 hi an khaw health care tih changtlunnan an hmang thin. An khuaah hian homestay 10 awmin khum 30 a awm a, kum khat chhungin mi 15000 atanga 20000 velin Sialsuk hi an tlawh thin anga chhut a ni. Siaksuk Village Council kaihhruaina in Sialsuk Tlang Committee (Sialsuk Ecotourism Development Committee) din a ni a, an ni hian tourism tih hmasawnna tur kawng hrang hrang an dap thin a ni.
Best Tourism Village Competition hi kum 2023 atang khan Ministry of Tourism hian World Tourism Day denchhenin a buatsaih tan a, a hmasa ber atan Reiek khua in Best Tourism Village an lo la tawh a ni.
New Delhi-a lawmman dawnnaah hian bialtu MLA leh Tourism secretary hi Sialsuk VCP R Lalruatkima leh VC member Lalmuanchhana ten an tawiawm a ni.