Industry tenau din kawnga hmarchhak dinhmun sawi ho

FINER (Federation of Industries in North Eastern Region) bultumin ‘International Conference on MSME in North East’ buatsaih a ni a. Commerce & Industries F Rodingliana’n a hmanpui.
Conference chhimtu Taiwan atanga lokal, entrepreneurs, university leh college zirlaite minister hian duhsakna hlanin, Mizoram chu agro-based leh horticulture based industries tan theihna nasa tak nei ni mah se, haichhuah loh a la ni a. Tun sawrkar kal mek chuan chutiang haichhuah nan leh mi taimate dinchhuah ve nan “Bana kaih policy” a duang ta tih a sawi a ni.
MSME tan sawrkar chu anmahni pui turin a ding reng dawn a, sumchang thlai (cash crop) – aieng, sawhthing leh hmarcha chingtute tan ruahhmanna fel tak siam niin, anmahni dawmkanna tur sum pawh budget-a dah a ni tih a sawi bawk.
Mizoram chu tlangram a ni a, inkalpawhna kawngpui a tha tawk loa, kum khatah ni 100 chuang ruah a sur bawk nen, industry din leh project kalpui nan sum sen a sang deuh tih F Rodingliana hian a sawi a. MSME policy leh guidelines chu state dang leh hmundanga an hman angte hman ve diak diak theih loh chin a awm mah se, Mizoram chu India rama state ralmuang ber a ni a, lehkhathiam tamna leh sakhua khat leh culture khat vuan kan nihna chuan thiltih a ti awlsam tih a sawi a ni.
Commerce & Industries director Maria CT Zuali chuan Mizoram chu MSME tan agri-based industries, horticulture- based industry, bamboo based industries, handloom & handicraft industries, eco- tourism, adventure tourism leh cultural tourism din nan leh kalpui nana hmun remchang leh rem tak a ni tih a sawi a. MSME tana Mizoram a thlanawm chhan chu, a sik leh sa leh a ram leilung a that bakah natural resources-ah a huasa a, a ralmuangin a mi chengte an taimak hle tih a sawi a ni.
FINER director Bhaskar Kakoty chuan conference huaihawt chhan leh FINER hmalakna hrang hrang a sawi a. MSME hotu lamin Ministry of MSME-in Mizorama MSME tana a hnatawh leh hmalawk tawhna a sawi bawk.
Technical session-ah powerpoint presentation hmangin Taiwan atanga rawn kal Ru Yi Yong chuan “Bamboo Sector Opportunities” tih leh Jui Tai Hong chuan “Opportunities in MSME Sectors” tih an zirtir a; MZU Department of Food Technology asst. professor Dr Himayoti Dutta chuan “Food processing in Mizoram through academia and research perspective” tih a zirtir a ni.
Conference-ah hian Mizoram chhung leh pawna entrepreneur-te bakah entrepreneurship lama tui zirlai – MZU leh college hrang hrang 5 atangin an tel a ni.