2030-ah ui a hri umbo tum

Khawvel hmun dang rualin Inrinni khan World Rabies Day 2024 pualin Aizawlah ‘Breaking Rabies Boundaries’ tih thupui hmangin hun hman a ni a. Kum 2030 ralhma ngeia ui a hri umbo tura hmalakna ‘State Action Plan for Rabies Elimination (SAPRE)’ chu Health & Family Welfare minister Lalrinpuii’n a tlangzarh. Heti hian Mizoram, Tamil Nadu leh Meghalaya chu India rama SAPRE tlangzarh hmasa ber an ni.
Health minister chuan Mizote chu ran ngaina tak kan ni a, khawtlang nunphung, eizawnna leh nitin khawsaknaah rante’n hmun pawimawh tak an chang tih sawiin, “Ram hmasawn zelah ui breed hrang hrang a awm zel a, chhungkaw member ang hiala kan ngaih ni mah se, pawnlam mite tana hlauhawm leh harsatna thlentu an nih loh nan a enkawl zui kawngah tanrual a ngai a, a bikin ui huaisar leh kawlhte kan ven uluk a ngai hle,” a ti.
Damdawi in hrang hrangah ui seh avanga hri danna la tam tak an awm tih sawiin, ui a seh avangin khawvel pumah kumtin mi 56000 chuangin an thihpui thin thu leh India ramah kumtin mi 20000 chuangin an thihpui thin thu a sawi.
World Health Organisation hmalakna ‘One Health’ concept chu nasa lehzuala kalpui leh inhrilhhriat tam a pawimawh tih Lalrinpuii hian a sawi a. WHO, FAO leh OIE ten kum 2030 ralhmaa ui seh atanga natna kai avanga thihna thleng thei tih reh tuma hma an la chu tha a tih thu sawiin, hemi tihlawhtling tur hian National Health Mission hnuaiah National Rabies Control Programme (NRCP) chak taka kalpui a ni chu lawmawm a tih thu a sawi a ni.
Rabies control programme hnuaia Health department leh Vety department thawhdunna fakawm a tih thu sawiin, ui seh atanga natna kai avanga mihring thihna thleng thin umbo turin hemi kaihhnawih sawrkar department leh NGO-te inkarah thawhhona tha tak a awm zel a beisei tih a sawi.
He hunah hian H&FW department, AH&Vety department, UNDP leh Jhpiego hnuaia thawktute bakah ran vulh kaihhnawih NGO aiawhte an tel.