Minister leh MLA-ten mantang ei kan tum lo – Lalramliana, MLA

ZPM sawrkarah minister leh MLA ten mantang ei an tum ve loh avangin contract hna hmututen hna tha taka thawk turin an phut tlat tih ZPM MLA Lalramliana chuan a sawi.
Thawhtannia ZPM party office-a inkhawmah Lunglei South bialtu MLA Lalramliana chuan, tunhma chuan contract hna thawh tur a awmin mantang ei an awm chhawng duat thin nia sawi a ni a, hna in a tuar a, hmasawnna rotling kan nei thei thin lo tih sawiin, “Kalphung tharah chuan minister leh MLA ten mantang ei kan tum ve loh avangin hna pawh a tha tur a ni tih hi kan phut tlat a ni,” a ti.
Tunlaiin eptu party-te atangin beihna an tawk nasa a, anmahni beitute chu party ruihchilh, hun rei tak ram lo hruai tawhtu, mipuiin an hnawl takte an nih avangin an chhiatna tur zawngtute thurawn leh duhdan anga kal an tum tur a ni lo tih a sawi.
“Kan ramah hian party thenkhatten hun rei tak politics kalphung hlui an lo kalpui tawh a, nimahse kalphung hlui zia duhawm lo tak tak kan party chhunga chhawmluh a rem lo tih hi mipuiin kan hriat a tul. Kalphung thar kan chuangkai tawh a ni tih hria a, mipui pawhin kalphung thar rilru kan put a tul. Inthamna eng eng emaw nena MLA hnena arva khai tumte hi kan awm ang tih ka hlau a, hetiang kalphung hlui zia hi ka bial chhung Lunglei South-ah phei chuan kan khap tlat a ni,” Lalramliana hian a ti.