Ruihhlo vanga nunna chante kum 19 leh 52 inkar

Ruihhlovin kawng hrang hrangin Mizoram a tibuai a, vanduaithlak takin ruihhlo vanga nunna chan zat pawh a pung zel; kumina ruihhlo vanga nunna chante hi kum 19 leh 52 inkar an ni.
Mizoram Excise & Narcotics (MEN) department-in an chhinchhiah danin, October ni 1 thleng khan kumin Mizoramah mi 61-in ruihhlo vangin nunna an chan tawh a, a naupang ber chu kum 19, a upa ber chu kum 52 a ni.
MEN department-in an website-a an tarlan dan enin tun hnaiah ruihhlo vanga nunna chan zat hi a pung a; September ni 5 thleng khan mi 52 an ni a, October ni 1-ah chuan 61 an tling tawh.
October ni 1 thlenga ruihhlo vanga vanduaina tawkte hi mipa 53 leh hmeichhia pariat an ni.
Mi 61-te zinga mi 34-te chu heroin vanga vanduaina tawk an ni a, mi dang 27-te chu damdawi ruihhlo chi hrang hrang vanga vanduaina tawk an ni. An chhinchhiah danin, mi 25 chu heroin leh damdawi ruihhlo chi dang vang an ni a, khuh damdawi leh ganja vanga vanduaina tawk pakhat a awm.
MEN department-in an chhinchhiah danin, kum liam ta 2023-ah khan Mizoramah mi 76-in ruihhlo vangin nunna an chan a, 2018 hnuah 2023 tih lohvah kumin hi ruihhlo vanga nunna chan an tam ber kum a ni tawh.
MEN department hian 1984 atangin ruihhlo vanga nunna chan zat hi an chhinchhiah a, mipa 1648 leh hmeichhia 225, an vaiin mi 1873-in ruihhlo vangin nunna an chan tawh.