Liverpool leh Aston Villa an chak ve leh

October 2, Nilaini zan khan UEFA Champions League (UCL) khelh chhunzawm a ni a, English club pahnih; Liverpool leh Aston Villa ten hnehna an chang. Europe a team lian Liverpool in si hnih faiin an mikhual Bologna an hneh a. Aston Villa in team lian Bayern Munich an hneh nawlh a, inlehthalna lian an thlentir.
Reds an kal zel
Manager thar Arne Slot hnuaia bul tan tha, English Premier League-a hmahruaitu ni mek Liverpool an khel tha chhunzawm zel. EPL hmahruaitu Liverpool hian champions league-a an match hnihnaah Italian club Bologna chu Anfield-ah an mikhual a, hma lam pana kal zelin hnehna an chang nawn leh.
EPL hmahruaitu Liverpool hian Anfield-a an mikhual Bologna lakah bul an tan tha viau a, goal pawh an thun thuai. Inkhel tan atanga minute 11-na lekah midfielder Alexis Mac Allister chuan Mohamed Salah siamsak atangin hmahruaina goal a thun. Hma takah goal an thun vangin inrintawkna sang zawk nen an inlan a, Italian club hian hlauhawm siam khawpin an nawr tlang hleithei meuh lo. Reds hian an muala khel tha zui viau mah se goal an thun belh thei bik mai lova, 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Liverpool in an khel tha chhunzawm viau. Reds hian an khingpuite nawr viau thin mah se goal an thun belh mai thei bik lo thung. Goal a luh belh theih loh reng hnuin hun tawp dawn hnaiah Reds an vannei leh ta nge nge. Khel tha tak Mohamed Salah chuan minute 75-naah Dominik Szoboszlai siamsak atangin an goal hnihna a thun a, an hmahruaina a tizau. Salah goal thun hnu hian goal dang a luh belh thei tawh lova, Liverpool chuan an mualah hnehna changin point thum an hmu.
Manager thar Arne Slot hnuaia khel tha Liverpool hian Champions League-ah vawi hnih khel tawhin hnehna an chang zawn a, point ruk hmuin panganaah an awm mek. Liverpool hian an khingpuite lakah goal nga an thun tawh a, goal khat chauh an la chhuah.
Villa an chak zel
Kum 41 zet hnua champions league khel phak ve leh nawlh Aston Villa chuan Villa Park-ah German club lian Bayern Munich an mikhual. English team lian te lakah pawh chak thei tak Bayern Munich hi an lo hneh nawlh a, inlehthalna lian an thlentir. Kum 41 hnua UCL an khelh leh hmasak berah Villa hi vawihnih an chak zawn ta hial a, point ruk hmuin table-ah parukna an luah thar.
Villa Park-a Aston Villa leh Bayern Munich inkhel hmuhnawm an lantir a, an inhnehtawk thial thial hle. Chak tura rinkai zawk Bayern Munich in bul an tan tha a, hlauhawm an siam nghal mawlh mawlh. England captain Harry Kane chuan hmahruaina goal a thun teuh hle a, hnai tak atanga a tauh chu si nghak Emiliano Martinez chuan pui zetin a dan sak. Martinez hian World Cup final a Kolo Muani pet dan ang deuh khan a kein Kane pet hi a dang a, a team a chhanhim. Martinez hi a chetha zui viau a, an chak theih nan a thawhhlawk hle. Ball chang tlem zawk leh goal chhuah teuh zawk an nih reng hnuin Villa hian an khingpuite an nawr let a, goal thun hmasa zawkah an tang. Pau Torres chuan hnaite atanga pet goal in hmahruaina goal thun bawk mah se VAR rawn a ni a, offside vangin hnawl a ni ve thung.
Chawlhlawk hnu lamah pawh Bayern Munich an khel tha zui viau a, an khingpuite an nawr ber tlat a ni ber. German club lian hian Villa dang betin, nawr tawm reng mah se a hmawr an bawk fuh thei lova, goal an thun thei lo zui zel. Mualneitu Villa hian awmze neiin an mikhualte nawr tlang thei lo reng mah se hun tawp dawn hnaihah an vannei ta nge nge. Bench atanga lut Jhon Durán chuan Bayern si nghak Manuel Nuer awm hmun fuh lo a hrem a, minute 79-naah hla tak atanga pet goal in hmahruaina goal a thun. He goal hian Bayern a barakhaih chiang hle a, Villa Park-a mipui 38,991 zette a chawk phur viau thung. Villa hi EPL lamah pawh an khel tha viau a, panganaah an awm mek a ni.
Bayern hian an si phurh sut tum viau mah se hun tawp thlengin goal an thun thei lova, Aston Villa lakah hreh tak chungin an tlawm zui ta a ni. Bayern Munich lakah point thum hlu tak an hlawhchhuah vangin Villa hian khelh hnih atangin point ruk an hmu a, table-ah parukna an luah. Hetihlai hian Bayern Munich hian point thum chauh an la hmu a, 15-naah an awm ve thung.