Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-ah hian a zawn lovin kar 13 a No.1 tling ta. He hla hi Shaboozey hla he chart-a No.1 kai thei hmasa ber niin, kumin July atang khan a No.1 tan a, kum 2020 hnulama he chart-a No.1 ni rei thei ber a ni tawh. Hetihrual hian The Weeknd leh Playboi Carti ‘Timeless’ chu No.3-ah a debut ve bawk.
Billboard Hot 100 chart hi kar khat chhunga US-a hla lar dan tenhna niin, chart ranking siam nan hian kar khat chhunga all-genre US streaming (official audio leh official video), radio airplay leh sales data te chu tehna pawimawh a ni.
‘A Bar Song (Tipsy)’ chuan kar khat chhungin stream maktaduai 26.7 leh sales 8,000 a la nei thei a, radio airplay pawh maktaduai 76.2a la tling a, hei hi chart-ah a No.1 pui leh ta a ni. Hot 100 chart-ah hian hla kar 13 chin No.1 thei hi 16 chiah a la awm a, chung zingah chuan ‘A Bar Song (Tipsy)’ hi a tel ve ta a ni.
Billie Eilish ‘Birds of a Feather’ chu No.6 atangin No.2 a kai thar a, Eilish hlaah chuan chart No.2 chin kai thei pathumna niin, a hla dang ‘Bad Guy’ chu 2019 khan No.1 kaiin, 2020 khan ‘Therefore I Am’ chu No.2 a lo kai tawh bawk. Eilish hian chart top 10-a lang thei hla 10 a nei tling tawh a ni.
The Weeknd leh Playboi Carti hla thar ‘Timeless’ chuan stream maktaduai 28.6, sales 6,000 leh radio airplay maktaduai 5.1 nei theiin No.3-ah a debut a. The Weeknd tan he chart top 10-a lang thei hla 19 a neihna niin, Playboi Carti tan a pangana a ni.
Chart No.1 hlui Post Malone ‘I Had Some Help’ featuring Morgan Wallen chu No.2 atangin No.4-ah a tawlh a, hetihlai hian Sabrina Carpenter chuan top 10-ah hla pathum bawk nei lehin, a zawnin kar ruk chhung hetiang dinhmunah hian a ding ta. Carpenter hla ‘Espresso’ chu No.3 atangin No.5-ah a tawlh a, a hla dang ‘Taste’ chu No.9-ah bawk la awmin, chart No.1 pawh lo kai tawh ‘Please Please Please’ chu No.8 atangin No.10-ah a tawlh ta bawk.
Lady Gaga leh Bruno Mars ‘Die With a Smile’ chu No.5 atangin No.6-ah a tawlh a, Chappell Roan ‘Good Luck, Babe!’ chu No.4 atangin No.7-a a tawlh a, chart No.1 hlui Teddy Swims ‘Lose Control’ chu No.7 atangin No.8-ah a tawlh ta bawk. ‘Lose Control’ hi Hot 100 chart-ah kar 60 a lang tling ta a, hetiang chin chart a lang thei hla 28-na a ni. Hot 100 chart-ah hian la 31,000 chuang a lang tawh a ni.
Shaboozey ‘A Bar Song (Tipsy)’ a la Hot ber
Get real time updates directly on you device, subscribe now.
Prev Post