Box office-ah ‘Resident Evil’ a No.1
Box office-ah ‘Resident Evil’ a No.1
Horror movie ‘Resident Evil’ film an siamthar chuan Hollywood box office No.1-ah a debut a. ‘Resident Evil’ film tlangzarh tawh zinga opening weekend-a sum lalut hnem ber a la ni a, kumina horror movie tlangzarh tawh zinga opening weekend-a sum lalut hnem ber a ni bawk.
Box office ranking hi kartawp (Zirtawpni – Pathianni) chhunga North America (a bikin USA) a cinema hall ticket hralhna sum chevel atanga teha siam thin a ni a, ‘Resident Evil’ hian opening weekend-ah dollar maktaduai 60 lalutin, No.1-ah a debut a, US pawn, ram dang 62 atangin dollar maktaduai 43.8 lalut bawkin, a vaiin dollar maktaduai 103.8 a lalut nghal a ni. ‘Resident Evil’ film an siam tawh pariat zinga tlangzarh kara chetha ber a la ni a, he film hi dollar maktaduai 75 senga siam a ni.
He film hi Zach Cregger-a direct niin, Austin Abrams, Zach Cherry, Kali Reis leh Paul Walter Hauser te channa niin, Raccoon City-a hri hlauhawm tak a len laia damdawi lam thil phurkualtu-in aa thil phurh deliver tura a thil tawn vel tarlanna a ni a, Cregger film siam tawh zinga ‘review’ la nei tha ber niin, a film siam tawh zinga opening weekend-a sum la lut hnem ber a ni bawk.
‘Practical Magic 2’-in a weekend vawi hnihnaah dollar maktaduai 12.1 la lut lehin No.2 a la ni, 1998-a tlangzarh tawh ‘Practical Magic’ chhunzawmnaah hian Sandra Bullock leh Nicole Kidman te changdun lehin, chhungkaw pakhata hmeichhia te hmangaihna lama an vanduai thei riau mai chu a tihtawp dan tur an zawn dan vel tarlanna a ni. He film hian kar hnih chhungin US-ah dollar maktaduai 46.7 a la lut tling ve ta bawk.
Box office-a kar ruk chhung No.1 ni thei ‘Spider-Man: Brand New Day’-in dollar maktaduai 6.5 la lut lehin No.3 a la ni a, Tom Holland leh a nupui Zendaya te channa Spider-Man film thar ber hian US-ah dollar maktaduai 944.5 la lut tling tawhin, US-a film sum la lut tam ber a la ni, US-a dollar tluklehdingawn la lut tling thei hmasa ber a ni thei ang em tihin ngaihven a hlawh tawh hle a ni.
‘Spider-Man: Brand New Day’ hian an tlangzarh atanga ni nga chhung lekin khawvel huapin dollar tluklehdingawn a la lut thei a, tunah chuan khawvel huapin dollar tluklehdingawn 2.455 a la lut tling tawh. He film hi dollar maktaduai 225 senga siam a ni.
‘The Odyssey’ pawh a la kal tluang viau a, a weekend vawi 10-naah dollar maktaduai 4.9 la lut lehin No.4 a ni a, he film hian US-ah kar 10 chhungin dollar maktaduai 609.7 a la lut tling ve tawh bawk.
Box office yop 5 khartu chu Coyote vs. Acme niin, a weekend vawi linaah dollar maktaduai 4.5 la lut lehin No.5 a la ni a, US bikah dollar maktaduai 54.6 a la lut tling ve tawh bawk.
‘Transformers: The Movie 40th Anniversary’-in dollar maktaduai 3.1 la lutin, No.8 a ni. 1986 animated film hi a kum 40 tlin champha pualin cinema hall-ah an tichhuak leh a ni.
Film tlangzarh thar Ethan Hawke leh Russell Crowe te channa ‘The Weight’-in opening weekend-ah dollar maktaduai 2.3 la lutin No.9 a ni, Hollywood star pahnih Ethan Hawke leh Russell Crowe te tan an film channa tlangzarh tawh zinga opening weekend-a sum la lut tlem ber a la ve ve.
Box Office Top 10:
1 Resident Evil $60,000,000
2 Practical Magic 2 $12,155,000
3 Spider-Man: Brand New Day $6,500,000
4 The Odyssey $4,900,000
5 Coyote vs. Acme $4,512,135
6 Runner $3,180,074
7 Daniel and the Fiery Furnace $3,140,000
8 Transformers: The Movie 40th Anniversary $3,103,922
9 The Weight $2,315,162
10 Buddy $1,929,101