Kawng chhia vanga tlan loh tum awm MCVU-in ram danga oil hralh loh duh

MCVU-in ram danga oil hralh loh duh
Mizoram Commercial Vehicle Union-in oil rate sang tihhniam phuta tiamchin awm loa lirthei tlan loh an tum chu sawrkar lam nen an inbiakfel lailawk avanga an chawlhsan hnu ah, kawng chhia avangin tiamchin awm loa tlan loh tum lirtheia eizawng pawl pathum an Mizoram Commercial Vehicle Union (MCVU) in vawiin, October 14 zing dar 6.00 atanga tiamchin awm loa tlan loh an tum chu NGO Coordination Committee hmalakna in MCVU hruaitute leh chief minister an inbia a, tunkar Nilainia cabinet thutkhawma petrol leh diesel man sang tihniam chungchang ngaihtuah nawn a nih dawn avangin an thil tum hi an thulh lailawk. MCVU hi lirtheia eizawng pawl 11 intelkhawmna a ni.
He pawla tel pathum – Mizoram Truck Driver Association (MTDA), Mizoram Tipper Association Driver’s & Owner’s leh eirawngbawlna gas phurtu – Mizoram Indane Driver Welfare chuan thuchhuah intawm siamin, October 5-a chief minister-in National Highway 306 Sairang – Durlui kawng chhia, October 9 ralhma ngeia siamtha tura NHIDCL leh an hnuaia contractor-te a hrilh chu October 9 hian an tlawh a, hmasawnna duhthusam hmuh tur a awm loh avangin, helai kawng chhe zualpui, truck tana tluk hlauhawm khawpa kawng khuarte siamthat a nih hma chuan tiamchin awm loa tlan loh nise, an ti.
Mizorama oil lo lut a that reng lai a, tualchhunga mipuiin oil lak tur kan tlachham reng nia lang chungchangah Mizoram Commercial Vehicle Union hruaitute hian Pathianni khan Supply minister B Lalchhanzova an kawm a. Burma leh Bangladesh-a man man zawka oil hralhruk a tam nia an hriat thu an thlen. Minister hian a rang thei ang bera hma a lak tur thu a lo hrilh a ni.
The Aizawl Post thudawn danin, Burma lama oil lakluh phalrai chungchang hi India sawrkarin a pawi ti lo nia sawi a ni. Burma tualchhung buainaah hian sawrkar sipai beitu mipui/ chibing sipai ho mamawh phuhruk lam hi a phalrai ru hle nia hriat a ni.
Hetihlai hian October 12 zan dar 9.00 vel khan Kawnpui Police Station duty-te chuan an thudawn bawhzuiin Kolasib atanga phurh diesel leh petrol phur lirthei pahnih an man. SML tipper MZ-07 A 0024 leh a neitu, a khalhtu ni bawk Rorelliana, Kawlchaw Lawngtlai district nia insawi leh, AS 11 FC 2238 leh a khalhtu Natab Uddin, Assam nia insawi an ni a. Lirthei pakhat zawk hi Rorelliana hian a hman hawh nia hriat a ni. Heng lirthei pahnih hian petrol litre 4620 leh diesel litre 4400 an phur a; diesel leh petrol hi Kolasib Khuangpuilama ATS Filling Station atanga lei niin, lirthei khalhtute hian an sawi. Petrol hi litre khatah Rs.104.66 leh diesel hi litre khatah Rs.86.95 in ATS Pump atangin an lei niin Rorelliana hian Kawnpui Police a hrilh a ni.
Thudawn danin, Kolasib DCSO thupek angin lirthei pahnih leh an thil phurh hi Kolasiba lak a ni a, vawiin – October 14 hian sawrkar thuneituten hma lak zui dan tur an rel dawn a ni.