Siaha district-ah TB vei 34

Siaha district-ah
TB vei 34
Kumina khak sample an test tawh atangin Siaha district TB vei hmuhchhuah thar 34 an awm.
District Tuberculosis Forum Siaha District chu Thawhlehni khan addl DC Abraham Beirazi Khithie kaihhruaiin an thukhawm a. Heta report danin, District TB Centre Siaha-ah hian kumin January atanga October 15 thleng khan khak sample 314 test tawh niin, heng zinga 34 chu TB vei an ni tih hmuhchhuah a ni. Tun dinhmunah treatment la mek mi 98 an awm.
District TB Control Forum tum ber chu, TB veite dinhmun hriatthiam pui a, chhawmdawl a, khawtlangah TB hluar zel tur titlem tura invenna kalpui bakah TB veite ei leh in tha pek leh chhawmdawl a ni.
Thutkhawmah hian TB chu natna inkaichhawn awlsam tak a nih avangin invenna leh enkawl dan tur mipui hnenah nasa zawka zirtir a pawimawh tih sawi a ni a. Siaha district-a khua a tam thei ang ber chu TB awm lohna khua (TB Free Village) a puan a nih theih nan theihtawpa hma lak nise, an ti.
TB free village ni tura tehna hrang hrang – khaw chhung mipui zaa 3 khak test a, TB vei an awm lohna khua ‘free village’ a puan an nih theih thu sawi a ni a. Nikshay Mitra chungchang pawh sawi niin, TB vei mi harsa zualte ei leh in tha an neih theih nana mipui thawhkhawm thinah a thawhtute chungah lawmthu sawi a ni.
National TB Control Programme hi kum 1992-a tan a ni a, kum 2002-ah Revised National TB Control Program tia thlak niin, kum 2020-ah National TB Elimination Program tia thlak leh a ni. Kum 2025 ah chuan India atanga TB umbo tumna programme a ni.