Mizoramah M-PACS 94 awm tawh

Mizoramah M-PACS
94 awm tawh
Sawrkar laipuiin loneitute leh ranvultute hmasawnna huang a buatsaih, New Multipurpose Primary Agricultural Credit Societies (M-PACS) chu tun thlengin Mizoramah 94 a awm tawh a, kum 2025 atang 2029 chhungin society 753 din belh hman tum a ni.
Chak zawka M-PACS kalpui a nih theih nan Thawhlehni khan Kolasib leh Khawzawlah District Cooperative Development Committee hnuaia sub-committee, Joint Working Committee chu addl DC kaihhruaina ve ve in an thukhawm a. MPACS Kolasib District convener JD Traite chuan MPACS hnuaia society awm leh an hmalakna a sawizau a. An district-a Multipurpose Primary Agricultural Credit Societies (M-PACS) awm tawh sate thawhthat dan tur leh chak zawka kalpui dan tur sawiho a ni bawk.
Khawzawl district-ah hian an convener H Lalhmachhuani chuan, Sahakar-se-Samriddhi policy (cooperation through cooperatives) hnuaiah cooperative society hrang hrang, PACS, dairy leh fisheries lam pawl din sawrkarin rem a tih avanga committee thukhawm an ni tih a sawi.
Sahakar- se-Samriddhi hnuaiah hian cooperative society hrang hrang hi kum 5 chhungin India ram khua zawng zawnga din tum a ni a. Ministry of Cooperation chuan NABARD, National Dairy Development Board leh National Fisheries Development Board nen tanghoin standard operating procedure a siam a, hemi hmang hian kalhmang tlangpui bakah kum 5 chhunga thil tum leh zawh hun tur duan vek a ni.
Tunah hian Mizoram pumah Primary Agricultural Credit Societies (M-PACS) 94 awmin, New M-PACS hnuaiah kum 2025 atanga 2029 chhungin society 753 din belh tura ruahman a ni. Fishery Development Board hnuaiah Mizoramah kum 2025 atanga 2029 chhungin fishery society 100 leh National Dairy Development Board hnuaiah dairy society 72 din turin ruahman a ni bawk.