SAY hnenah ruihhlo that lohna hrilh

SAY hnenah ruihhlo that lohna hrilh
Southern Division Salvation Army Youth Council (SDSAYC) leh District Health Society Lunglei District tangdun huaihawtin Thawhtanni khan Southern Division huamchhunga Salvation Army thalai (SAY) tan Lungleiah ruihhlo that loh zia inzirtir pahin natna inkai chhawn theih loh (non-communicable disease) chungchang inhrilh a ni.
NCD Sub-Committee chairman, additional DC James Miahlung chuan Healthy Lunglei District Campaign kalpui dan a sawi a. Nunphung hrisel nei turin kohhran thalaite afuih. SAY member-te chu zuk leh hmuam laka fihlim a, ruihhlo do kawnga theihtawp chhuah a, ei leh in uluk a, taksa sawizawi ngaipawimawh tur leh heng hi midang hnena zirtir chhawng thin turin a chah a ni.
Ruihhlo do leh NCD campaign-ah hian Sazaikawn Upper PHC-a medical officer Dr Ruth Lalrinawmi chuan NCD vei theih dan, a hlauhawm dan leh inven dan a sawi a. NCD laka fihlim tura tih tur leh tih loh tur a zirtir. WADA Centre-a counsellor Ch Lalhruaitluanga’n ruihhlo that loh na a zirtir thung.
Awareness campaign hman zawh hian SAY member-te hriselna dinhmun hi Health department-a thawktuten an endiksak a ni.