F1-ah Toyota kirleh ta…

F1-ah Toyota kirleh ta…
2009 season tawp ruala Formula 1 atanga inhnukdawk Japanese car company Toyota chu kum 15 chhung zet car intlansiak level sangber atanga a kalbo hnuah karliamta kartawp United States Grand Prix atang khan F1-ah a kirleh ta a, a letleh dan erawh US-a inkulh Haas team behchhanin a ni ta thung.
Toyota hi Haas chuan technical partner angin an thawhpui a, thuchhuah intawm an siamah company pahnih chuan tawnhriat leh thiamna an inpe tawn dawn a, hmanrua pawh an intawm dawn a ni.
Toyota lam hian design, technical leh manufacturing service lam an tum dawn a, Haas hian thiamna lama tawnhriat bakah sumdawnna lama an thiam thil bik an phawrh ve thung ang.
Karliamta October ni 18-20 chhunga Texas state khawpuiber Austin-a F1 race atang khan Haas car-ah Toyota hming (branding) kan hmu tan a; American team hian Japanese thiamna an dawt tel rualin kumin kumtir lama kum 2028 thleng awh tur contract an pawhseipui Italian team Ferrari ‘power-units’ erawh an hman chhunzawm zel dawn a ni.
Team pangngai ang pui pui ni rih lo mah se F1 khawvela Toyota kirleh ta hi company pahnih bakah he sport pumpui tan pawh hmasawnna chhinchhiahtlak tiin a sawi theih awm e.
Tarlan tawh angin, kum riat zet mahnia team nei chunga a zawna Formula One inelna an hmachhawn hnuah kum 2002-09 season zawh rual khan F1 an tawpsan a; an hun laia Formula One khawvela fund dawng tha bera ngaih an ni chung khan race-ah hnehna vawikhat mah an chang zo lo!