ZPM an nghet thei tak tak lo – Dr R Lalthangliana

Party dang chu an ngheh hle laiin pawl 5/6 vel intelkhawm ZPM chu an nghet ve thei tak tak lo tih MNF senior vice president Dr R Lalthangliana chuan a sawi.
Sinlung Hills Council inthlan neih tura campaign-a kal MNF senior vice president chuan ZPM chu pawl 5/6 vel inthlungkhawm an ni a, tun sawrkar ang hi Mizoramah a la piang ngai lo, tiin, Congress leh MNF chu party malin an sawrkar thin a, party an nghet hle a, ZPM chu an nghet ve thei tak tak lo tih a sawi.
“Min enchhin rawh u, an tih avangin mipuiin ZPM enchhin an chak a, kan han enchhin ta a; thla 10 an sawrkar chhung hian mipui rin ang an ni lo hle a, min enchhin rawh u, titute hian enchhin an dawl lo tan hle a, rei an kal a rinawm loh,” a ti.
Ration card vara la ten a let thawka man toin an la tih a sawi bakah Aizawl Municipal huamchhungah chauh a man toa la turin insawi mah se, thingtlangah pawh a man to vekin an la leh si niin Dr R Lalthangliana hian a sawi. Oil man a to a, kawng a chhe em em a, sawrkar hnathawk chungah an inluling hle a, mipui beng a thlep tan hle tih a sawi bawk.
Local council 84 awmah 74 velah MNF an sawrkar mek a, nakum lawka VC leh LC inthlan turah tun boruak kal mek thlirin an sawrkar leh ngei dawn nia a lan thu MNF hruaitu hian a sawi a. Hei vang hian tun SHC inthlanah MNF an sawrkar ngei a tul tih a sawi a ni