Saudi thlalera Nadal hnehtu Djokovic

Saudi thlalera Nadal hnehtu Djokovic
Saudi Arabia khawpui Riyadh-a tennis exhibition tournament Six Kings Slam exhibition event an tihah Serbia superstar Novak Djokovic leh Spain chhuanvawr Rafael Nadal chuan Inrinni khan pathumna an inchuh ta ngei a, 6-2, 7-6 (5)-in Djokovic a chak.
Season tawp ruala tennis inelna chawlhsan ve tawh tur Rafael Nadal tan tun kha a career-a a elpui lian kumhlun Novak Djokovic a hmachhawn tawpna a ni ta a, inkhelh banah Spaniard hian Serb lakah lawmthu a sawi.
Tarlan tawh thin angin, thla thar Davis Cup Final hi Nadal-a’n tournament a hmachhawn tawpna tur a ni tawh dawn a; November ni 19-24 chhunga Malaga khaw tournament-ah hian Spain tan Nadal hian doubles a khel dawn a, kumin Paris Olympic Games ang bawkin Carlos Alcaraz nen an inkawp leh dawn a, singles a khelh dawn leh dawn loh erawh a la chiang rih lo a, ram tana hnehna chang thei tur khawpa a inngaih leh ngaih lohah a innghat dawn tih a lo sawi tawh a ni.
Grand Slam title 22 la tling Nadal-a record khuma major title 24 hawn tawh Novak Djokovic chuan Riyadh khaw exhibition event-a pathumna inchuhah Nadal a hneh tih tarlan a ni tawh a, khelmual chhunga a hmelma kumhlun laka a tlawm hnuah Spaniard chuan, “Kan career-ah court chhunga hun min hmanpui tawh zawng zawng avangin Novak chungah ka lawm a, kan zinkawng kha inelna ropui a ni.
“Ka mimal thil han phawrh tel ila, he kum 15 chhunga insawrchhuahna tawpkhawk min phawrhsaktu i ni a, nang hi awm lo la player ka nihna zawnah tun dinhmun hi ka thleng hauh lo ang.
“I tan leh i team tana title hei zozai i hlawhchhuah leh i career ropui chungchuang avang hian ka lawmpui che a, i hmalam hun atan duhsakna sang ber ka hlan a che,” tiin inthlahdah thei loa siamtu leh player ropui zawk ni tura mawlh tlat thintu Djokovic lakah lawmthu a sawi.
Spaniard Nadal hian a career-ah vawi 60 zet Djokovic hi a hmachhawn tling ta a, mipa tennis-a insu ngun ber niin, chuti zat match-ah chuan Nadal hi vawi 29 a chak a, Serb hi tum 31 a chak thung.
Thathona leh phurna sang tak nena microphone din chilh Djokovic pawhin tennis khawvela an hun hman dun tawh zawng zawng avangin Nadal lakah lawmthu a sawi ve nghal a, tennis tana a rohlu hnutchhiah avangin lawmthu a hrilh.