Sawrkar tla tur hun tawp lam hmang ang mai an ni – Lalruatkima

Sawrkar tla tur hun tawp lam hmang ang mai an ni
– Lalruatkima
ZPM sawrkar chu sawrkar tla tur hun tawp lam hmang ang maiin an buai nuai nuai tih MNF treasurer Lalruatkima chuan a sawi
Sinlung Hills Council inthlan tura campaign-a chhuak MNF hruaitu hian, Zoram pumah kawng a chhe em em a, Aizawl khawpuiah ngei pawh kawng an siamtha hleithei loa, kan chaklakna kawng an siamtha hleithei loa, kawng hrang hrangin harsatna kan tawk mek tih a sawi.
Petrol leh diesel man a sang a, lirthei neitute an nuar dawn a. Zirlaite Midday meal pawh an pe hleithei ta loa, mipui vantlang ration card neih – card var lah nise a letin a man an tisang tih sawiin, “Kawng hrang hrangin Zoram hi a buai nuai mai a. Neutral an beidawng tawh em em a. Kum khat em pawh an la sawrkar hma in sawrkar tla tur hun tawp lam hmang ang mai an ni,” a ti.
Enchhin azawnga enchhin fuh lo ber Zoramin a tawng a ni tih chu neutral mipui ngaihdan a ni a; reilote kan enchhin chhungin mipui an beidawng der tawh niin Lalruatkima hian a sawi. “Kan puk ve loang an tih, sum lah chu vibelchhe 2800 dawn an puk tawh,” a ti.
MNF kan tho leh dawn tih MNF treasurer hian sawiin, “Kan tihsualte siamtha in Zoram tan MNF a lo tho chhuak leh dawn. Pathian leh kan ram tan, titu MNF hi Pathian vangin a dingchhuak leh dawn a. Tuna kan chief minister ni ta Pu Lalduhoma’n a lo sawi tawh angin, MNF hi zalenna sualtu party kan ni a, Mizo hnam a awm chhung chu a ral dawn lo,” a ti.